കാലാവസ്ഥാ സാക്ഷരത വർധിപ്പിക്കാനായി എറണാകുളത്ത് ഇനി മഴമാപിനികൾ

എറണാകുളം ജില്ലയിൽ ജനകീയ പങ്കാളിത്തത്തോടുകൂടി മഴയളവ് രേഖപ്പെടുത്തുന്നതിനുള്ള മഴമാപിനികൾ സ്ഥാപിക്കുന്നതുമായി ബന്ധപ്പെട്ട് സംഘടിപ്പിച്ച 'മഴയറിവ്' ശിൽപ്പശാലയിൽ സംസാരിച്ച് ജില്ലാ കളക്ടർ. കാലാവസ്ഥാ വ്യതിയാനത്തെ ചെറുക്കുന്നതിന് പ്രാദേശിക സമൂഹത്തെ സജ്ജമാക്കണമെന്ന് ജില്ലാ കളക്ടർ ജി പ്രിയങ്ക പറഞ്ഞു. വരുംകാലങ്ങളിൽ കാലാവസ്ഥ വ്യതിയാനം മൂലം കൂടുതൽ പ്രതിസന്ധികൾ നേരിടേണ്ടി വരാം. ഇതിനെ പ്രതിരോധിക്കുന്നതിനായി ജനകീയ പങ്കാളിത്തതോടെ വ്യാപകമായ പ്രവർത്തനങ്ങൾ സംഘടിപ്പിക്കേണ്ടത് അനിവാര്യമാണ്. കാലാവസ്ഥയെ സൂക്ഷ്മമായി പഠിക്കാനും, കാലാവസ്ഥ വ്യതിയാനം മൂലം ഉണ്ടാകുന്ന ആഘാതങ്ങളെ അതിജീവിക്കാനും, അതുമായി ബന്ധപ്പെട്ട മാറ്റങ്ങളുമായി പൊരുത്തപ്പെട്ട് മുന്നോട്ടുപോകാനും ശേഷിയുള്ള ഒരു സമൂഹത്തെ വളർത്തിയെടുക്കുക എന്നത് വളരെ പ്രധാനപ്പെട്ട ഘടകമാണ് - ജില്ലാ കളക്ടർ പറഞ്ഞു.