പ്രകാശപൂരിതമാകാൻ കോഴിക്കോട്; 5000 എൽ ഇ ഡി തെരുവ് വിളക്കുകൾ സ്ഥാപിക്കാൻ പുതിയ പദ്ധതി

കോഴിക്കോട് കോർപ്പറേഷൻ്റെ പ്രവർത്തനങ്ങൾ മാതൃകാപരമാണെന്നു മന്ത്രി പി എ മുഹമ്മദ് റിയാസിൻ്റെ പ്രസ്താവന. മാതൃകാപരമായ നിരവധി പ്രവർത്തനങ്ങളാണ് കോഴിക്കോട് കോർപ്പറേഷൻ്റെ നിലവിലെ ഭരണസമിതി ഏറ്റെടുത്ത് നടപ്പാക്കിയതെന്ന് പൊതുമരാമത്ത്-ടൂറിസം വകുപ്പ് മന്ത്രി പി എ മുഹമ്മദ് റിയാസ്. പുതിയ 5000 എൽഇഡി തെരുവ് വിളക്കുകൾ സ്ഥാപിക്കുന്നതിൻ്റെ ഉദ്ഘാടനവും നവീകരിച്ച സെൻട്രൽ കൺട്രോൾ ആൻഡ് മോണിറ്ററിങ് സിസ്റ്റം (സിസിഎംഎസ്) പ്രഖ്യാപനവും നിർവഹിക്കുകയായിരുന്നു മന്ത്രി. കാലത്തിൻ്റെ മാറ്റത്തെ തിരിച്ചറിഞ്ഞുകൊണ്ട് ഒരു ഭരണകൂടം ഇടപെടുമ്പോഴാണ് നാട് ആഗ്രഹിക്കുന്ന നിലയിലേക്ക് ആ ഭരണം മുന്നോട്ടു പോവുകയെന്ന് അദ്ദേഹം പറഞ്ഞു. 5000 വിളക്കുകൾ കത്തുമ്പോൾ ആ വെളിച്ചം ആശ്വാസമാകുന്നത് ലക്ഷക്കണക്കിന് മനുഷ്യർക്കാണ് എന്നതാണ് പദ്ധതിയുടെ പ്രത്യേകതയെന്നും മന്ത്രി പറഞ്ഞു.