മരണത്തെ ആഘോഷമാക്കിയ 'ചാവുകല്ല്യാണം': കുറഞ്ഞ ബഡ്ജറ്റിൽ ഒരുങ്ങിയ ചിത്രം IFFK യുടെ അന്തിമ പട്ടികയിൽ

മലബാറിലെ ഒരു മരണത്തിനെ ആസ്‌പദമാക്കി ഒരുക്കിയ ചാവുകല്ല്യാണം, തനതായ ഉള്ളടക്കം കൊണ്ടും ആഖ്യാനശൈലി കൊണ്ടും വേറിട്ട്‌ നിൽക്കുന്നു. ലളിതമായ കഥയും, പശ്ചാത്തലവും, കഥാപാത്രങ്ങളും രസകരമായി സങ്കലനം ചെയ്ത ചാവുകല്ല്യാണം ഒരു മോക്യൂമെൻ്ററി മൂവി രൂപേണയാണ് അനിയറപ്രവർത്തകർ രൂപകല്പന ചെയ്തിരിക്കുന്നത്. ശ്രീഹരി രാധാകൃഷ്ണൻ ചായഗ്രഹണം ചെയ്ത്, നിതിൻ ജോർജ് സംഗീതം നിർവഹിച്ച ഈ ചലച്ചിത്രം പൂർണമായും പുതുമുഖങ്ങളെ വെച്ചാണ് ചിത്രീകരിച്ചിരിക്കുന്നത് എന്നതും ശ്രദ്ധേയമാണ്. ഡിസംബർ പകുതിയോടെ തിരുവനന്തപുരത്ത് ആരംഭിക്കുന്ന 30-ാമത് IFFK യിൽ പ്രദർശിപ്പിക്കുന്ന ചാവുകല്ല്യാണത്തിന്മേലുള്ള പ്രതീക്ഷ വാനോളമാണെന്ന് അഭിനേതാക്കളും അണിയറ പ്രവർത്തകരും പങ്കുവച്ചു. വിഷ്ണു ബി ബീന രചനയും സംവിധാനവും നിർവഹിച്ച ചിത്രമാണ് ചാവുകല്ല്യാണം; The Celebration of Death.

പത്ത് വർഷത്തെ ആർമി ജീവിതം മതിയാക്കിയ ശേഷമാണ് വിഷ്ണു ബീന സിനിമയിലേക്ക് എത്തുന്നത്. സിനിമയോടുള്ള അതിയായ ആഗ്രഹം കൊണ്ടെത്തിച്ചത് വിഷ്വൽ മീഡിയയിൽ ബിരുദ വിദ്യാഭ്യാസ യോഗ്യതയിലേക്കാണ്. ചാവുകല്ല്യാണം: The Celebration of Death എന്ന സിനിമയുടെ പശ്ചാത്തലം മരണാന്തര ചടങ്ങുകൾ നടക്കുന്ന മലബാറിലെ ഒരു വീടാണ്. അണിയറ പ്രവർത്തകരിൽ മിക്കവരും കോഴിക്കോട്ടുകാർ ആണ്.