അടുത്ത വാട്ടർ ഫെസ്റ്റിന് വരാൻ പുതിയ മേൽപ്പാലം; ബേപ്പൂരിൻ്റെ വികസനക്കുതിപ്പ് പ്രഖ്യാപിച്ച് മന്ത്രി

ബേപ്പൂർ നിയോജക മണ്ഡലത്തിലെ തീരദേശ മേഖലയിൽ ജനങ്ങളുടെ ഐക്യം വർധിപ്പിക്കാനും ടൂറിസം ഭൂപടത്തിൽ ബേപ്പൂരിൻ്റെ സ്ഥാനം ഉറപ്പിക്കാനും വാട്ടർ ഫെസ്റ്റ് കാരണമായതായി മന്ത്രി പി എ മുഹമ്മദ് റിയാസ്. അഞ്ചാമത് ബേപ്പൂർ ഇൻ്റർനാഷനൽ വാട്ടർ ഫെസ്റ്റിൻ്റെ ഉദ്ഘാടനം നിർവഹിക്കുകയായിരുന്നു മന്ത്രി. ജനങ്ങളെ ഒന്നിച്ച് ചേർക്കാൻ ഫെസ്റ്റ് പോലുള്ള കൂടിച്ചേരലുകൾക്ക് സാധിക്കും. അന്താരാഷ്ട്ര തലത്തിൽ ശ്രദ്ധിക്കപ്പെടുന്ന നിലയിലേക്ക് ബേപ്പൂർ വാട്ടർ ഫെസ്റ്റും ബേപ്പൂർ നിയോജകമണ്ഡലത്തിലെ ടൂറിസ്റ്റ് കേന്ദ്രങ്ങളും മാറിയതായും മന്ത്രി പറഞ്ഞു. നാടിൻ്റെ എക്കാലത്തെയും ആവശ്യമായ ചെറുവണ്ണൂർ മേൽപ്പാലത്തിലൂടെയാകും അടുത്ത വാട്ടർ ഫെസ്റ്റിനായി ആളുകളെത്തുക. മീഞ്ചന്ത മേൽപ്പാലം, ചാലിയം-കരുവൻത്തുരുത്തി പാലം എന്നിവയുടെ നിർമാണം അടുത്ത വർഷം ആരംഭിക്കാനാകും. ബേപ്പൂരിൻ്റെ സാമ്പത്തികവും സാമൂഹികവുമായ അഭിവൃദ്ധിക്ക് കാരണമായ വാട്ടർ ഫെസ്റ്റ് വരും വർഷങ്ങളിലും തുടരുമെന്നും മന്ത്രി പറഞ്ഞു. ചടങ്ങിൽ ജില്ലാ കലക്ടർ സ്നേഹിൽകുമാർ സിംഗ് അധ്യക്ഷത വഹിച്ചു. ടൂറിസം ഡയറക്‌ടർ ശിഖ സുരേന്ദ്രൻ, മുൻ എംഎൽഎ വി കെ സി മമ്മദ് കോയ, ജില്ലാ പോലീസ് മേധാവി ടി നാരായണൻ, ടൂറിസം ജോയിൻ്റ് ഡയറക്‌ടർ ഡി ഗിരീഷ് കുമാർ, ഫാദർ ജിജു പള്ളിപറമ്പ്, പ്രകാശൻ കറുത്തേടത്ത് എന്നിവർ സംസാരിച്ചു.