എൽഡിഎഫിന് ജയത്തോടെ തുടക്കം; കണ്ണൂരിൽ അഞ്ച് തദ്ദേശ സ്ഥാപനങ്ങളിലെ 15 വാർഡുകളിൽ എതിരില്ലാതെ വിജയം

Also Read- തെരഞ്ഞെടുപ്പിന് മുമ്പേ LDF വിജയം ആരംഭിച്ചു; കണ്ണൂർ ആന്തൂർ നഗരസഭയിൽ ആറിടത്ത് എതിരില്ലാതെ സ്ഥാനാർഥികൾ വിജയിച്ചു

ആന്തൂർ നഗരസഭയിലെ 2, 3, 10 , 11 , 16 , 24 എന്നീ വാർഡുകളിൽ ഇത്തവണ എൽഡിഎഫ് സ്ഥാനാർത്ഥികൾ മാത്രമേ നാമനിർദേശപത്രിക സമർപ്പിച്ചു ഉള്ളൂ. ആറിടത്ത് എതിരില്ല എന്നത് എൽഡിഎഫിനുള്ള ജനപിന്തുണയുടെ തെളിവാണെന്ന് സ്ഥാനാർത്ഥികൾ പറയുന്നു. ആന്തൂർ നഗരസഭയെ കുറിച്ച് യുഡിഎഫ് ഉന്നയിച്ച ആരോപണം ജനങ്ങൾ തള്ളിക്കളഞ്ഞിരിക്കുന്നു എന്ന് ഇതോടെ വ്യക്തമായി എന്ന് സി പി മുഹാസ് ന്യൂസ് 18 നോട് പറഞ്ഞു. ആന്തൂർ മുനിസിപ്പാലിറ്റിയിൽ കഴിഞ്ഞ തവണ പ്രതിപക്ഷമില്ലായിരുന്നു. 28 ൽ പതിനാലിടത്ത്‌ എൽഡിഎഫ് എതിരില്ലാതെ തെരഞ്ഞെടുക്കപ്പെടുകയായിരുന്നു.

Also Read- കാസർകോട് മടിക്കൈ പഞ്ചായത്തിൽ പ്രസിഡണ്ട് സ്ഥാനാർത്ഥി ഉൾപ്പെടെ മൂന്നു സിപിഎം സ്ഥാനാർഥികൾക്ക് എതിരില്ല; വീടുകയറി ഭീഷണിപ്പെടുത്തിയെന്ന് ബിജെപി

അതേസമയം, സിപിഎമ്മിന്റെ ഭീഷണിയെ തുടർന്നാണ് സ്ഥാനാർത്ഥികൾ പിൻവലിഞ്ഞതെന്ന് യുഡിഎഫ് മണ്ഡലം ചെയർമാൻ സമദ് കടമ്പേരി ആരോപിച്ചു. ആകെ 15 വാർഡുകളിലാണ് കണ്ണൂരിൽ എൽ ഡി എഫ് സ്ഥാനാർത്ഥികൾക്ക് എതിരില്ലാത്തത്. ഇതിൽ 7 വാർഡുകൾ നഗരസഭയിലും 8 വാർഡുകൾ പഞ്ചായത്തിലാണ്.

" നാമനിര്‍ദ്ദേശ സമര്‍പ്പണത്തിന്‍റെ ആദ്യ ഘട്ടത്തില്‍ തന്നെ 15 വാര്‍ഡുകളില്‍ എതിരില്ലാതെ വിജയിച്ചത് എല്‍ ഡി എഫ് മുന്നേറ്റം തെളിയിക്കുന്നതാണ്. 3 ഗ്രാമപഞ്ചായത്തുകളിലും, 2 മുന്‍സിപ്പാലിറ്റികളിലുമാണ് 15 സ്ഥാനാര്‍ത്ഥികള്‍ എതിരില്ലാതെ തെരഞ്ഞെടുക്കപ്പെട്ടത്. യു ഡി എഫും ബിജെപിയും സ്ഥാനാര്‍ത്ഥികളെ പോലും കണ്ടെത്താന്‍ കഴിയാതെയുള്ള തകര്‍ച്ചയിലാണ് " - സിപിഎം ജില്ലാ സെക്രട്ടറി എം വി ജയരാജന്‍ പ്രസ്താവനയിൽ പറഞ്ഞു.

തളിപ്പറമ്പ മുൻസിപ്പാലിറ്റി കൂവോട് വാർഡിലും, കോട്ടയം മലബാറിലെ മുന്നാം വാർഡിലും കാങ്കോൽ ആലപ്പടമ്പ ഗ്രാമപഞ്ചായത്തിൽ 9, 11 വാർഡുകളിലും മലപ്പട്ടം പഞ്ചായത്തിൽഅഞ്ചു വാർഡുകളിലുമാണ് എൽഡിഎഫ് സ്ഥാനാർഥികൾക്ക് എതിരില്ലാത്തത്.