സിപിഎം ക്ഷണം മുസ്ലിം ലീഗ് തള്ളി; ഏക സിവിൽ കോഡ് സെമിനാറിൽ പങ്കെടുക്കില്ല

ഏക സിവിൽ കോഡ് വിഷയത്തിൽ എല്ലാവരും ഒരുമിച്ച് നിൽക്കണം. അത് ഒരു ദേശീയ വിഷയമാണ്. മുസ്ലിം സമുദായത്തെ മാത്രമല്ല ബാധിക്കുന്നത്. ബില്ലിനെ പരാജയപ്പെടുത്താൻ എല്ലാ രാഷ്ട്രീയ പാർട്ടികളുടെയും പിന്തുണ വേണ്ടി വരും എന്ന് ആണ് മുസ്ലിം സംഘടനകളുടെ തീരുമാനം- പാണക്കാട് സാദിഖലി തങ്ങൾ പറഞ്ഞു.

Also Read- ‘ഒന്നല്ല നാല് സെമിനാറുകൾ നടത്തും; പള്ളികളെ കുറിച്ച് പറഞ്ഞത് ഇംഗ്ലണ്ടിൽ കണ്ട കാര്യം’: എം.വി. ഗോവിന്ദൻ

ലീഗ് യുഡിഎഫിന്റെ ഏറ്റവും വലിയ കക്ഷി. ശക്തമായി ഇതിൽ പ്രതികരിക്കാൻ കഴിയുക യുഡിഎഫിനാണ്. സിപിഎം ക്ഷണിച്ചത് ലീഗിനെ മാത്രമാണ്. മറ്റ് പാർട്ടികളെ ക്ഷണിച്ചില്ല. കോൺഗ്രസിനെ മാറ്റി നിർത്തി മുന്നോട്ട് പോകാൻ കഴിയില്ല. സംഘടനകൾക്ക് പങ്കെടുക്കാൻ അധികാരം നൽകിയിട്ടുണ്ട്. അത് കൊണ്ട് സമസ്ത പങ്കെടുക്കുന്നത് വിവാദം ആക്കേണ്ട.

ഇന്ത്യൻ നാഷണൽ കോൺഗ്രസിനെ മാറ്റി നിർത്തി ഉള്ള ഒരു പ്രതിഷേധത്തിൽ ലീഗ് പങ്കെടുക്കില്ല. സെമിനാറിൽ പങ്കെടുക്കുക അല്ല, ബില്ലിനെ പരാജയപ്പെടുത്തുക ആണ് പ്രധാനം. ബില്ലിനെ പരാജയപ്പെടുത്താൻ പാർലമെന്റിൽ കോൺഗ്രസ് വേണമെന്നും ലീഗ് വ്യക്തമാക്കി. പാണക്കാട് സാദിഖലി ശിഹാബ് തങ്ങളുടെ നേതൃത്വത്തിൽ ഒരു മണിപ്പൂർ സന്ദർശിക്കാനും യോഗത്തിൽ തീരുമാനമായി.

Also Read- ‘ഇഎംഎസിന്റേത്‌ ശരിയായ നിലപാട്, ആ ചര്‍ച്ച ഇപ്പോള്‍ വേണ്ട, അതിനല്ല ഇപ്പോൾ പ്രസക്തി’; സിപിഎം നേതാവ് എ വിജയരാഘവന്‍

സെമിനാറിലേക്ക് ലീഗിനെയും സമസ്തയെയും സിപിഎം ക്ഷണിച്ചത് കേരള രാഷ്ട്രീയത്തില്‍ വലിയ ചര്‍ച്ചകൾക്കാണ് തുടക്കമിട്ടത്. ലീഗ് മുന്നണി മാറ്റത്തിന് തയാറെടുക്കുന്നു എന്ന രീതിയിലുള്ള ചർച്ചകൾ നിലനിൽക്കുന്നതിനിടെയായിരുന്നു സിപിഎമ്മിന്റെ ക്ഷണം.

മുസ്ലിം ലീഗുമായി തൊട്ടുകൂടായ്മയില്ലെന്ന് സിപിഎം സംസ്ഥാന സെക്രട്ടറി എം വി ഗോവിന്ദൻ ഇന്നലെ വീണ്ടും ആവർത്തിച്ചിരുന്നു. സെമിനാറിൽ പങ്കെടുക്കാനാണ് ലീഗ് തീരുമാനമെങ്കിൽ മുന്നണിമാറ്റ അഭ്യൂഹങ്ങൾക്ക് ചൂടേറുമായിരുന്നു.

Also Read- ‘സിപിഎം ഉത്തരത്തില്‍ ഇരിക്കുന്നത് എടുക്കാന്‍ നോക്കുമ്പോള്‍ കക്ഷത്തില്‍ ഇരിക്കുന്നത് പോകാതെ നോക്കണം’; വി ഡി സതീശൻ

തീരുമാനമെടുക്കുന്നതിന് മുൻപേ സെമിനാറിൽ പങ്കെടുക്കുമെന്ന് സമസ്ത പ്രഖ്യാപിച്ചതും ലീഗിനെ വെട്ടിലാക്കിയിരുന്നു. ലീഗിന്റെ അടിത്തറയാണ് സമസ്തയുടെ അണികളായ ഇ കെ വിഭാഗം. സിപിഎം ബന്ധത്തിന്റെ പേരിൽ സമസ്ത നേതൃത്വവും ലീഗും തമ്മിൽ തർക്കങ്ങളുണ്ട്.