പ്രധാനമന്ത്രി വീണ്ടും കേരളത്തിൽ, നാലിന് തിരുവനന്തപുരത്തെത്തും

തിരുവനന്തപുരത്ത് കിള്ളിപ്പാലം മുതൽ കരമന വരെയുള്ള ഒന്നര കിലോമീറ്റർ ദൂരം റോഡ് ഷോ നടത്തും. തിരുവനന്തപുരം സെൻട്രൽ, നേമം മണ്ഡലങ്ങളിലൂടെ‌യാണ് റോഡ്ഷോ കടന്നുപോകുന്നത്. ഉച്ചയ്ക്ക് 1.30-ന് തിരുവല്ല പബ്ലിക് സ്റ്റേ‍ഡിയത്തിലെ പൊതുപരിപാടിയിൽ പങ്കെടുക്കും. തിരുവല്ല, ആറന്മുള, ചെങ്ങന്നൂർ ഉൾപ്പെടെയുള്ള 10 നിയമസഭാ മണ്ഡലങ്ങളിലെ പ്രവർത്തകർക്ക് വോട്ടഭ്യർത്ഥിക്കുന്നതിനാണ് മോദി എത്തുന്നത്.

നേരത്തെ, കോട്ടയം പാലായിലും പ്രചരണ പരിപാടി സംഘടിപ്പിച്ചിരുന്നു. എന്നാൽ പൊതുയോ​ഗത്തിന് സൗകര്യമൊരുക്കാൻ അനുയോജ്യമായ മൈതാനം ലഭ്യമല്ലാത്തതിനാലാണ് സന്ദർശനം ഒഴിവാക്കിയത്.

ഒരാഴ്ചയ്ക്കിടെ രണ്ടാമത്തെ തവണയാണ് പ്രധാനമന്ത്രി കേരളത്തിൽ എത്തുന്നത്. മാർച്ച് 29-ന് പാലക്കാട് നടന്ന തിരഞ്ഞെടുപ്പ് പ്രചരണ റാലി പ്രധാനമന്ത്രി ഉദ്ഘാടനം ചെയ്തു. തുടർന്ന് തൃശൂരിലെ സ്വരാജ് റൗണ്ടിൽ നടന്ന റോഡ്ഷോയിലും അദ്ദേഹം പങ്കെടുത്തിരുന്നു.