KSRTC പറഞ്ഞുവിട്ട ദിനിയക്ക് തൊഴിലുമായി സ്വകാര്യ ബസ് ഓപ്പറേറ്റർ

കെഎസ്ആർടിസിയിലെ എംപാനല്‍ ജീവനക്കാരെ ഒഴിവാക്കി പിഎസ്‌സി റാങ്ക് പട്ടികയില്‍ നിന്ന് നിയമനം നല്‍കാന്‍ ഹൈക്കോടതി ഉത്തരവ് വന്നിരിക്കുകയാണ്. ഇതോടെ നാലായിരത്തോളം ജീവനക്കാര്‍ക്കാണ് ഒരു സുപ്രഭാതത്തിൽ‌ തൊഴിൽ നഷ്ടപ്പെട്ടത്. പല ജീവനക്കാരും കരഞ്ഞുകൊണ്ടാണ് വീട്ടിലേക്ക് മടങ്ങിയത്. ആലപ്പുഴയിലെ ഏറ്റവും മികച്ച കെഎസ്ആർടിസി ജീവനക്കാരിക്കുള്ള അവാർഡ് നേടിയ ദിനിയ അവരിലൊരാളാണ്. പറക്കമുറ്റാത്ത രണ്ട് കു‍ഞ്ഞുങ്ങളുടെ ഭാവി ഇരുളടയുമെന്ന വേദനയോടെയാണ് പതിനൊന്ന് വര്‍ഷത്തെ സേവനം അവസാനിപ്പിച്ച് ദിനിയ കണ്ണീരോടെ ഡിപ്പോയിൽ നിന്നും മടങ്ങിയത്. ഭർത്താവ് മരിച്ചതോടെ രണ്ടാം ക്ലാസുകാരിയായ മകളും അ‍ഞ്ച് വയസുകാരനായ മകനും പ്രായമായ അമ്മയുമടങ്ങുന്ന കുടുംബം പട്ടിണിയാകാതെ കഴിഞ്ഞു പോകുന്നത് ദിനിയയുടെ വരുമാനം കൊണ്ടായിരുന്നു. ഈ വാർത്ത ന്യൂസ് 18 അടക്കമുള്ള മാധ്യമങ്ങൾ‌ റിപ്പോർട്ട് ചെയ്തിരുന്നു. കെഎസ്ആർടിസി കൈയൊഴിഞ്ഞ ദിനിയക്ക് ഇപ്പോൾ പിന്തുണയുമായി എത്തിയിരിക്കുകയാണ് പ്രമുഖ പ്രൈവറ്റ് ബസ് ഓപ്പറേറ്ററായ 'സന ട്രാൻസ്‌പോർട്ട്'. ബസ് പ്രേമികളുടെ കൂട്ടായ്മയായ 'ബസ് കേരള' എന്ന ഗ്രൂപ്പിലാണ് ഇതിനെക്കുറിച്ച് ഔദ്യോഗികമായി പോസ്റ്റ് ഇട്ടിരിക്കുന്നത്.