ബിജെപിയിൽ ചേർന്ന രശ്മി മത്സരിക്കുമെന്ന് രാജീവ്‌ ചന്ദ്രശേഖർ; കൊട്ടാരക്കരയിൽ മാരാരുടെ തട്ട് താഴുമോ?

2021-ലെ നിയമസഭാ തെരഞ്ഞെടുപ്പിൽ കൊട്ടാരക്കര മണ്ഡലത്തിലെ യുഡിഎഫ് സ്ഥാനാർത്ഥിയായിരുന്നു ആർ. രശ്മി. സി.പി.എം. നേതാവായിരുന്ന മുൻ എംഎൽഎ ആയിഷ പോറ്റി കോൺഗ്രസിലെത്തിയതോടെ കൊട്ടാരക്കര മണ്ഡലത്തിൽ രശ്മിക്ക് സീറ്റ് ഉണ്ടാവില്ല എന്നുറപ്പായിരുന്നു. കഴിഞ്ഞ നിയമസഭാ തിരഞ്ഞെടുപ്പിനുശേഷം കൊട്ടാരക്കരയിൽ നിന്നുണ്ടായ തിക്താനുഭവങ്ങളാണ് പാർട്ടിയിൽ നിന്നകലാൻ കാരണമായതെന്നും രശ്‌മി വാർത്താസമ്മേളനത്തിൽ വ്യക്തമാക്കിയിരുന്നു. രശ്മി മുന്നോട്ട് വച്ച രണ്ട് ഉപാധികൾ കോൺഗ്രസ് അംഗീകരിച്ചില്ല എന്നും വിവരമുണ്ട്.

അതേസമയം മൂന്നാഴ്ച മുമ്പ് എൻ.ഡി.എ സഖ്യത്തിലെത്തിയ ട്വൻറി 20യിലേക്ക് ബിഗ് ബോസ് താരം അഖിൽ മാരാർ പ്രവേശനം നടത്തിയതിനു തൊട്ടു പിന്നാലെയാണ് രശ്മി ബി.ജെ.പിയിലേക്കെത്തുന്നത് എന്നതും ശ്രദ്ധേയമാണ്. വരാനിരിക്കുന്ന നിയമസഭാ തെരഞ്ഞെടുപ്പിൽ ട്വന്റി 20 യുടെ സ്ഥാനാർത്ഥിയായി അഖിൽ മത്സരിക്കുമെന്ന് പാർട്ടി പ്രസിഡന്റ് സാബു എം. ജേക്കബ് പറഞ്ഞിരുന്നു. എൻ‌ഡി‌എയുമായി ചർച്ച ചെയ്ത ശേഷം മണ്ഡലം തീരുമാനിക്കുമെന്നായിരുന്നു അദ്ദേഹം പറഞ്ഞത്. കൊട്ടാരക്കരയിൽ നിന്ന് മത്സരിച്ച രശ്മി കൂടി എൻഡിഎയുടെ ഭാഗമായതോടെ കൊട്ടാരക്കര സ്വദേശിയായ സെലിബ്രിറ്റി മത്സരാർത്ഥി കൂടിയായ അഖിൽ മാരാരും ഇതേ മണ്ഡലത്തിൽ നിന്നും മത്സരിക്കുമോ എന്ന കാര്യത്തിൽ ആശയക്കുഴപ്പം നിഴലിക്കുന്നുണ്ട്.