വന്ദേഭാരതിലെ സുഹൃത്തിൻ്റെ ക്ളാസ് മാറിക്കയറ്റത്തിൽ ടി.ടി.ഇ ക്ഷമ ചോദിച്ചിട്ടും സ്പീക്കർ മൈൻഡ് ചെയ്തില്ലെന്ന് SRMU

നിയമസഭാ സ്പീക്കർ എ.എൻ. ഷംസീറിൻ്റെ സുഹൃത്ത് വന്ദേഭാരതിൽ ക്ളാസ് മാറിക്കയറി യാത്ര ചെയ്തത് ടി.ടി.ഇ ജി.എസ്.പദ്മകുമാർ ചോദ്യം ചെയ്ത സംഭവത്തിൽ ടി.ടി.ഇ ക്ഷമ ചോദിച്ചിട്ടും സ്പീക്കർ കേൾക്കാൻ കൂട്ടാക്കിയില്ലെന്ന് കുറ്റപ്പെടുത്തി സതേൺ റെയിൽവേ മസ്ദൂർ യൂണിയൻ ( SRMU) രംഗത്ത്. കാസർകോട്- തിരുവനന്തപുരം വന്ദേഭാരത് എക്സ്പ്രസിൽ എക്സിക്യൂട്ടീവ് ക്ളാസിൽ സഞ്ചരിക്കുകയായിരുന്ന സ്പീക്കർ എ.എൻ ഷംസീറിനടുത്തേയ്ക്ക് തൊട്ടടുത്തെ ചെയർ കോച്ചിൽ സഞ്ചരിക്കുകയയായിരുന്ന സുഹൃത്ത് എത്തിയതും മടങ്ങാൻ വൈകിയതുമാണ് വിവാദത്തിന് തിരികൊളുത്തിയത്. തൃശൂരിൽ നിന്ന് ക്ളാസ് മാറിക്കയറിയ സുഹൃത്ത് കോട്ടയം എത്തിയപ്പോഴു മാറാത്തത് ടി.ടി.ഇ പദ്മകുമാർ ചോദ്യം ചെയ്യുകയും എക്സിക്യൂട്ടീവ് ക്ളാസിലെ നിരക്ക് വെത്യാസം തന്നാൽ സ്പീക്കറുടെ അടുത്ത് സീറ്റ് അനുവദിക്കാമെന്നും അറിയിച്ചു . ഇത് തർക്കമായതിനെത്തുടർന്ന് ടി.ടി.ഇയ്ക്കെതിരെ ഫോണിൽ റെയിൽവേ ഉന്നത ഉദ്യോഗസ്ഥനോടും പിന്നീട് രേഖാമൂലം ഡി.ആർ.എമ്മിനും സ്പീക്കർ പരാതി നൽകുകയായിരുന്നു. റെയിൽവേ ഉന്നത ഉദ്യോഗസ്ഥരുമായി സംസാരിച്ചതിനെത്തുടർന്ന് പദ്മകുമാർ സ്പീക്കറോട് ക്ഷമ ചോദിച്ചിരുന്നെന്ന് യൂണിയൻ പറയുന്നു.