ഇത്ര ചിരിക്കാനുണ്ടോ? 'സമസ്ത മേഖലയ്ക്കും കരുത്തേകുന്ന ബജറ്റെ'ന്ന മുഖ്യമന്ത്രിയുടെ ഫേസ്ബുക്ക് പോസ്റ്റിൽ നിറയുന്നത് 'ചിരി'

ഫേസ്ബുക്ക് പോസ്റ്റിന് 28,000 റിയാക്ഷനുകള്‍ ലഭിച്ചപ്പോൾ ഇതിൽ പതിനയ്യായിരത്തോളവും ചിരി റിയാക്ഷനുകളാണ്. പോസ്റ്റിൽ ഒമ്പതിനായിരത്തിലധികം കമന്റുകളാണ് ഉള്ളത്. ഇതിൽ ബജറ്റിനെതിരെയുള്ള രോക്ഷവും കാണാം.

കേന്ദ്ര ​ഗവൺമെന്‍റ് സൃഷ്ടിച്ച സാമ്പത്തിക പ്രതിബന്ധങ്ങളെ ക്രിയാത്മകമായി മറികടന്ന് സംസ്ഥാനത്തെ വികസന പാതയിലൂടെ മുന്നോട്ട് നയിക്കുന്നതിനുള്ള ശക്തമായ ഇടപെടലാണ് 2023-24ലെ ബജറ്റെന്ന് മുഖ്യമന്ത്രി പിണറായി വിജയന്‍ ഫേസ്ബുക്കിൽ കുറിച്ചത്. വികസനയാത്രയ്ക്ക് വേഗം കൂട്ടുകയും കൂടുതൽ ഉത്തേജനം നൽകുകയും ചെയ്യുന്ന ബജറ്റാണ് ധനമന്ത്രി അവതരിപ്പിച്ചതെന്ന് മുഖ്യമന്ത്രി പോസ്റ്റിൽ പറയുന്നു.

കേന്ദ്രസർക്കാരിന്റെ അവ​ഗണന നിറഞ്ഞതും അസമത്വം വർധിപ്പിക്കുന്നതുമായ സമീപനങ്ങളെയും അതിജീവിച്ച് ഈ നാടിനെ മുന്നോട്ടുനയിക്കാനുദ്ദേശിച്ചുള്ള ബജറ്റിനെ കേരളജനത സർവ്വാത്മനാ പിന്തുണയ്ക്കുമെന്ന് ഉറപ്പുണ്ടെന്നും മുഖ്യമന്ത്രി പോസ്റ്റിൽ കുറിച്ചിരുന്നു.