ഹീറോയാണ് പീയൂഷ്, പരിമിതികളെ തുരത്തി ബോഡി ബിൽഡിംഗിൽ 'മിസ്റ്റർ തിരുവനന്തപുരം' പട്ടം സ്വന്തമാക്കി

നാല് വർഷം മുൻപാണ് പീയൂഷ് തൻ്റെ കായിക സ്വപ്നങ്ങളുമായി ജിമ്മിലെത്തുന്നത്. ജന്മനാ ഉള്ള ശാരീരിക പരിമിതികളെ നിരന്തരമായ പരിശീലനത്തിലൂടെയും ആത്മവിശ്വാസത്തിലൂടെയും മറികടക്കാൻ ഈ യുവാവിന് സാധിച്ചു. ജിമ്മിലെ ചിട്ടയായ വർക്കൗട്ടുകളും കഠിനമായ പ്രയത്നവും നാലാം വർഷം പീയൂഷിനെ തേടി വലിയൊരു അംഗീകാരമെത്തിച്ചു.

2025-26 വർഷത്തെ ബോഡി ബിൽഡിംഗ് ചാമ്പ്യൻഷിപ്പിൽ ശാരീരിക പരിമിതിയുള്ളവരുടെ വിഭാഗത്തിൽ 'മിസ്റ്റർ തിരുവനന്തപുരം' പട്ടം ചൂടിയാണ് പീയൂഷ് ഏവരെയും അത്ഭുതപ്പെടുത്തിയത്. തൻ്റെ കുറവുകളെ ഓർത്ത് തളർന്നിരിക്കാതെ, അവയെ കരുത്താക്കി മാറ്റി വേദിയിൽ തിളങ്ങിയ പീയൂഷിനെ ആദരിക്കാൻ  സാധിച്ചത് ഏറെ സന്തോഷം നൽകുന്ന കാര്യമാണെന്ന് പിയൂഷിൻ്റെ വീട്ടിലെത്തി അദ്ദേഹത്തെ ആദരിച്ച ഐ ബി സതീഷ് എംഎൽഎ പറഞ്ഞു.

നിശ്ചയദാർഢ്യമുണ്ടെങ്കിൽ ഏതൊരു പ്രതിസന്ധിയെയും മറികടന്ന് വിജയത്തിലെത്താം എന്നതിൻ്റെ ജീവിക്കുന്ന ഉദാഹരണമാണ് ഈ യുവാവ്.