ആറ്റുകാലിൽ വിസ്മയമൊരുങ്ങുന്നു! പൊങ്കാല മഹോത്സവത്തിന് മാറ്റുകൂട്ടാൻ 60 അടി ഉയരത്തിൽ ബ്രഹ്മാണ്ഡ കണ്ണകി ശിൽപം

പ്രശസ്ത ശിൽപി ദേവദത്തൻ്റെ (ആഴിമല ശിവക്ഷേത്രത്തിലെ ഗംഗാദേശ്വര ശിൽപ്പം നിർമ്മിച്ച ശില്പി) നേതൃത്വത്തിൽ അതിവേഗം പുരോഗമിക്കുന്ന ഈ ശിൽപ്പം വരാനിരിക്കുന്ന പൊങ്കാലയ്ക്ക് മുൻപ് തന്നെ ഭക്തർക്കായി സമർപ്പിക്കാനാണ് ക്ഷേത്ര ട്രസ്റ്റ് ലക്ഷ്യമിടുന്നത്.

ആറ്റുകാൽ ഭഗവതിയുടെ ഐതിഹ്യവുമായി അഭേദ്യമായി ബന്ധപ്പെട്ടു കിടക്കുന്ന കണ്ണകിയുടെ ഈ കൂറ്റൻ രൂപം ക്ഷേത്രത്തിലെത്തുന്ന ആയിരക്കണക്കിന് ഭക്തർക്ക് പുതിയൊരു ആത്മീയ-കാഴ്ചാനുഭവമാകും. അനന്തപുരിയുടെ സാംസ്കാരിക പൈതൃകത്തിന് മുതൽക്കൂട്ടാകുന്ന ഈ നിർമ്മിതി വരും വർഷങ്ങളിൽ തിരുവനന്തപുരത്തെ പ്രധാന ടൂറിസം-ആത്മീയ കേന്ദ്രങ്ങളിലൊന്നായി ആറ്റുകാലിനെ കൂടുതൽ പ്രശസ്തമാക്കും.

ഭക്തിയും കലയും ഒത്തുചേരുന്ന ഈ വിസ്മയം പൊങ്കാല നഗരിയിലേക്ക് എത്തുന്ന ജനലക്ഷങ്ങൾക്ക് ദൃശ്യവിരുന്നാകുമെന്നുറപ്പാണ്. നിലവിൽ ആഴിമല ഉൾപ്പെടെയുള്ള ക്ഷേത്രങ്ങളിൽ എത്തുന്നവർ ഏറെ വിസ്മയത്തോടെ നോക്കി കാണുന്ന ഗംഗാദേശ്വര ശില്പം പോലെ ആറ്റുകാലിലെ കണ്ണകി ശില്പവും മാറുമെന്നാണ് പ്രതീക്ഷ.