ബാർ ലൈസൻസ് ഫീസ് 35 ലക്ഷമായി വർധിപ്പിക്കും; ഷാപ്പുകളുടെ ദൂരപരിധി കുറയ്ക്കും; പുതിയ അബ്കാരി നയത്തിൽ ശുപാർശകളെന്തൊക്കെ?

വിദ്യാഭ്യാസ, മത സ്ഥാപനങ്ങളിൽ നിന്നും ശ്മശാനങ്ങളിൽ നിന്നും കള്ളുഷാപ്പുകളിലേക്കുള്ള ദുരപരിധി 100 മീറ്റർ‌ വരെ കുറയും. ഷാപ്പുകൾക്ക് സ്റ്റാർ ക്ലാസിഫിക്കേഷൻ ഏര്‍പ്പെടുത്തിയ ശേഷമാകും ദൂരപരിധി ഇളവ് നൽകുക. ക്ലാസിഫിക്കേഷന്‍ ഇല്ലാത്തവയ്ക്ക് നിലവിലെ ദൂരപിരധി തുടരും.

ബാര്‍ ലൈസന്‍സ് ഫീസ് 30 ലക്ഷത്തിൽ നിന്ന് 35 ലക്ഷമായി വർധിപ്പിക്കാന്‍ ശൂപാർശയുണ്ട്. ബാർ ലൈസൻ‌സ് ഫീസ് മൂന്നു വർഷമായി വര്‍ധിപ്പിച്ചിട്ടില്ല. സംസ്ഥാനത്ത് 740 ബാറുകളാണുള്ളത്. 5170 കള്ളു ഷാപ്പുകളും നിലവിലുണ്ട്. ഇവയുടെ ലൈസൻസ് രണ്ടു മാസത്തേക്ക് സർക്കാർ നീട്ടി നൽകിയിട്ടുണ്ട്. നയം പ്രാബല്യത്തില്‍ വരുമ്പോൾ സർക്കാർ നിശ്ചയിക്കുന്ന ഫീസ് നൽകാമെന്ന സത്യവാങ്മൂലം ബാറുടമകളിൽ നിന്ന് വാങ്ങി ഏപ്രില്‍‌ രണ്ടു മുതല്‍ പ്രവർത്തിക്കാൻ അനുമതി നൽകും.

ടൂറിസം കേന്ദ്രങ്ങളിൽ പ്രത്യേക കാലയളവിൽ ‘സീസണൽ ബീയർ-വൈൻ’ ലൈസൻസ് നൽകാന്‍ എക്സൈസ് ശുപാർശയുണ്ട്. ധന്യേതര കാർഷിക ഉല്പന്നങ്ങള്‍ ഉപയോഗിച്ച് നിശ്ചിത വീര്യത്തിൽ നിർമ്മിക്കുന്ന വൈൻ ബെവ്കോ വഴി വില്‍ക്കാനും നിർദേശമുണ്ട്. അടുത്ത മന്ത്രിസഭാ യോഗത്തില്‍ പുതിയ അബ്കാരി നയം അവതരിപ്പിക്കുമെന്നാണ് സൂചന.