ഗർഭിണിയായ കാമുകിയെ വീട്ടിൽ താമസിപ്പിച്ചതിന് പിണങ്ങിപ്പോയ ഭാര്യയുടെ വീടിന് മുന്നിൽ ജീവനൊടുക്കുമെന്ന് ഭർത്താവിന്റെ ഭീഷണി

കഴിഞ്ഞ ദിവസം രാത്രി 11 മണിക്കാണ് ഭാര്യയുടെ വീടിന് മുന്നിലെ ട്രാൻസ്ഫോർമറിന് മുകളിൽ യുവാവ് കയറിയത്. കെവി ലൈൻ കടന്നുപോകുന്ന ട്രാൻസ്ഫോമറിന് മുകളിലാണ് യുവാവ് വലിഞ്ഞുകയറിയത്. തുടർന്ന് ആത്മഹത്യാഭീഷണി മുഴക്കുകയായിരുന്നു. നാട്ടുകാർ വിവരമറിയിച്ചതോടെ ഉടൻ തന്നെ വൈദ്യുതി ബന്ധം വിച്ഛേദിച്ചു. രാത്രി മുഴുവൻ യുവാവിനെ അനുനയിപ്പിച്ച് താഴെയിറക്കാൻ പൊലീസും അ​ഗ്നിരക്ഷാസേനയും ശ്രമിച്ചു.

ഏഴ് മാസം ഗർഭിണിയായ കാമുകിയെ വീട്ടിൽ താമസിപ്പിച്ചതിനാണ് ഭാര്യ പിണങ്ങി സ്വന്തം വീട്ടിലേക്ക് പോയത്. ഇനി തിരികെ വരില്ലെന്ന് പറഞ്ഞാണ് യുവതി പോയത്. ഇതോടെയാണ് ട്രാൻസ്ഫോമറിൽ കയറി യുവാവ് ഭീഷണിമുഴക്കിയത്.

മൊബൈൽ ഫോണിൽ വീഡിയോ ചിത്രീകരിക്കാൻ ശ്രമിക്കുമ്പോൾ യുവാവ് കൂടുതൽ പ്രകോപിതനാകുന്നുണ്ടായിരുന്നു. പൊലീസിന്റെയും അ​ഗ്നിരക്ഷാസേനയുടെയും മണിക്കൂറുകൾ നീണ്ട പരിശ്രമത്തിന് ശേഷമാണ് ആരോമലിനെ താഴെയിറക്കിയത്.