പുരുഷന്മാരിലും ആര്‍ത്തവവിരാമമോ? ആന്‍ഡ്രോപോസിനെക്കുറിച്ചും പുരുഷന്മാരിലെ ഹോര്‍മോണല്‍ വ്യതിയാനത്തെക്കുറിച്ചുമറിയാം

ആര്‍ത്തവവിരാമത്തിലൂടെ കടന്നുപോകുന്ന സ്ത്രീകള്‍ നേരിടുന്ന വെല്ലുവിളികള്‍ ഇന്ന് തുറന്ന് ചര്‍ച്ച ചെയ്യപ്പെടാറുണ്ട്. എന്നാല്‍ ഇതോടൊപ്പം പുരുഷന്മാരുടെ ആരോഗ്യ പ്രശ്‌നങ്ങളും ശ്രദ്ധയില്‍പ്പെടുത്തേണ്ടതുണ്ട്.

ആന്‍ഡ്രോപോസ് സംഭവിക്കുമ്പോള്‍ ചില പുരുഷന്മാര്‍ക്ക്, എല്ലാവര്‍ക്കുമല്ലെങ്കില്‍ പോലും, ഹോര്‍മോണ്‍ വ്യത്യാസങ്ങള്‍ കാരണം സ്ത്രീകളില്‍ ആര്‍ത്തവവിരാമ സമയത്ത് അനുഭവപ്പെടുന്നതിന് സമാനമായ ലക്ഷണങ്ങള്‍ കണ്ടുവരാറുണ്ട്. പ്രായം കൂടുമ്പോള്‍ അവരില്‍ ടെസ്‌റ്റോസ്റ്റിറോണ്‍ ഹോര്‍മോണിന്റെ അളവ് കുറയുന്നു.

ഈ ഘട്ടത്തില്‍ പുരുഷന്മാര്‍ തങ്ങളുടെ മൊത്തത്തിലുള്ള ക്ഷേമം ഉറപ്പാക്കണമെന്ന് വിദഗ്ധര്‍ പറയുന്നു. ദിനചര്യയില്‍ വ്യായാമം ഉള്‍പ്പെടുത്തണം. പോഷകങ്ങള്‍ അടങ്ങിയ സമീകൃത ആഹാരം ശീലമാക്കണം. മദ്യപാനം, പുകവലി, മയക്കുമരുന്ന് ഉപയോഗം എന്നിവ ഉപേക്ഷിക്കണം. സംസ്‌കരിച്ച ഭക്ഷണങ്ങള്‍ കഴിക്കുന്നതും ഒഴിവാക്കണം. യോഗം, ധ്യാനം എന്നിവ ശീലമാക്കുന്നത് മാനസിക സമ്മര്‍ദം ഒരു പരിധിവരെ നിയന്ത്രിച്ച് നിര്‍ത്താന്‍ സഹായിക്കും. പതിവായി ആരോഗ്യവിദഗ്ധനുമായി കൂടിക്കാഴ്ച നടത്തുകയും വേണ്ട പരിശോധനകള്‍ നടത്തുകയും വേണം.