വര്‍ക്കൗട്ട് ചെയ്തിട്ടും ശരീരത്തില്‍ മാറ്റമൊന്നും കാണുന്നില്ലേ?

ഫിറ്റ്നസ് നേടിയെടുക്കുന്നതിനായി കൃത്യമായ ഭക്ഷണക്രമവും വ്യായാമവും പാലിച്ചിട്ടും പ്രതീക്ഷിച്ച ഫലം ലഭിക്കാത്തവരാണോ നിങ്ങൾ? കൃത്യമായി ഉറക്കം ലഭിക്കാത്തത് ആയിരിക്കും ഇവിടെ നിങ്ങൾക്ക് വെല്ലുവിളിയായി മാറുന്നത് എന്നാണ് വിദഗ്ധര്‍ പറയുന്നത്. ശരീരത്തിന് മതിയായ ഉറക്കം ലഭിക്കേണ്ടത് ഫിറ്റ്നസിന് നിർണായകമാണ്. നമ്മുടെ ശാരീരികവും മാനസികവുമായ ക്ഷേമം നിലനിർത്തുന്നതിലും ഉറക്കം പ്രധാന പങ്കു വഹിക്കുന്നുണ്ട്. പേശികൾക്ക് ആവശ്യത്തിന് വിശ്രമം ലഭിക്കുന്നതിനും ഹോർമോൺനില നിയന്ത്രിക്കാനും കണ്ണിന്റെ ആരോഗ്യത്തിനും ഉറക്കം അത്യന്താപേക്ഷിതമാണെന്ന് ഫിറ്റ്നസ് ആൻഡ് വെൽനസ് കോച്ച് മിറ്റെൻ കക്കയ്യ പറയുന്നു.