ശ്രീമുരുകന്റെ ആറുപടൈ വീട്ടിലേക്ക് മുതിർന്ന പൗരൻമാർക്ക് തീർഥാടനം; തമിഴ്നാട് സർക്കാരിന്റെ ആത്മീയ പദ്ധതി

മുരുകന്റെ ആറ് ക്ഷേത്രങ്ങളിലേക്കാണ് തീര്‍ത്ഥാടനം സംഘടിപ്പിക്കുന്നത്. തമിഴ് സംഘകാല കൃതികളിലും ഈ ആറ് ക്ഷേത്രങ്ങളെപ്പറ്റി പറയുന്നുണ്ട്. നക്കീരര്‍ രചിച്ച തിരുമുരുഗതൃപാദെ, അരുണഗിരിനാഥര്‍ രചിച്ച തിരുപ്പുഗള്‍ എന്നീ കൃതികളിലും ഇതേപ്പറ്റി പറയുന്നുണ്ട്. തിരുപ്പറങ്കുന്ദ്രം, തിരിച്ചെന്തൂര്‍,പഴനി, സ്വാമിമലൈ, തിരുത്തണി, പഴമുടിര്‍ചോലൈ എന്നിവിടങ്ങളിലാണ് ഈ ആറ് ക്ഷേത്രങ്ങള്‍ സ്ഥിതി ചെയ്യുന്നത്.

ഒരു ഭക്തന് 15,830 രൂപയാണ് സംസ്ഥാന സര്‍ക്കാര്‍ തീര്‍ത്ഥാടനത്തിന് അനുവദിച്ചിരിക്കുന്ന തുക. 1000 മുതിര്‍ന്ന പൗരന്‍മാരുടെ തീര്‍ത്ഥാടന യാത്ര സുഗമമാക്കാന്‍ 1.6 കോടി രൂപ സംസ്ഥാനസര്‍ക്കാര്‍ അനുവദിച്ചിട്ടുണ്ടെന്നും മന്ത്രി ശേഖർ ബാബു മാധ്യമപ്രവര്‍ത്തകരോട് പറഞ്ഞു. കന്തകൊട്ടം പ്രദേശത്തെ അരുള്‍മിഗു മുത്തുകുമാരസ്വാമി തിരുക്കോവിലിലാണ് ഉദ്ഘാടനം നടന്നത്. തെരഞ്ഞെടുക്കപ്പെട്ട 207 മുതിര്‍ന്നപൗരന്‍മാര്‍ക്ക് യാത്ര കിറ്റുകളും ബാഗുകളും മന്ത്രി സമ്മാനിച്ചു.