ലോകത്തിലെ ഏറ്റവും ഉയരം കൂടിയ ഹനുമാൻ വിഗ്രഹം; ആന്ധ്രയിലെ വംശധാര നദീതീരത്ത് ഭക്തജനത്തിരക്ക്

പ്രദേശത്തെ ഭക്തരിലൊരാൾ ലോകത്തിലെ ഏറ്റവും ഉയരം കൂടിയ ഹനുമാന്റെ പ്രതിമ നിർമിക്കുന്നത് സ്വപ്നം കണ്ടിരുന്നു. തുടർന്ന്, ഈ ലക്ഷ്യത്തിനായി പ്രത്യേകം കമ്മിറ്റിയും രൂപീകരിച്ചു. കമ്മിറ്റിയുടെ സ്ഥാപക അംഗങ്ങളിലൊരാളായ ചീപ്പുരുപള്ളി സ്വദേശി എം.എസ്.എൻ.രാജു പ്രതിമ നിർമിക്കാൻ 10 ലക്ഷം രൂപ സംഭാവന നൽകി. പിന്നീട് ഹൈന്ദവ ധർമ സംരക്ഷണത്തിനായി നൂറുകണക്കിന് ഭക്തർ വൻതുക സംഭാവന നൽകി. അങ്ങനെ 2007 ലാണ് ഈ വി​ഗ്രഹത്തിന്റെ നിർമാണ പ്രവൃത്തികൾ ആരംഭിച്ചത്.

2007-ൽ ഇതേ സ്ഥലത്ത് ഒരു മണ്ഡപം നിർമിക്കുകയും വി​ഗ്രഹം നിർമിക്കുന്നതിനുള്ള തറക്കല്ലിടുകയും ചെയ്തു. രാജ്യമെമ്പാടുമുള്ള ഋഷിമാരും ആത്മീയ ആചാര്യന്മാരും വേദപണ്ഡിതരും ചടങ്ങിൽ പങ്കെടുത്തിരുന്നു. ഹൈന്ദവ ധർമ്മം സംരക്ഷിക്കുന്നതിനും ഹൈന്ദവ സംസ്കാരവും പാരമ്പര്യവും ഭാവി തലമുറയുടെ ഉന്നമനത്തിനായി സംരക്ഷിക്കേണ്ടതിന്റെ ആവശ്യകതയെക്കുറിച്ചും അവർ ഊന്നിപ്പറഞ്ഞിരുന്നു. രാജ്യത്തെ പ്രധാന ആത്മീയ കേന്ദ്രങ്ങളിലൊന്നാക്കി ഈ സ്ഥലത്തെ മാറ്റാനുള്ള ആ​ഗ്രഹവും പലരും പ്രകടിപ്പിച്ചിരുന്നു. 2009 ലാണ് ഈ ഹനുമാൻ വിഗ്രഹത്തിന്റെ നിർമാണം പൂർത്തിയായത്.

”മനുഷ്യരാശിയുടെ ക്ഷേമത്തിനായി വംശധാര നദിയുടെ തീരത്ത് ഞങ്ങൾ പതിവായി യാഗങ്ങളും മറ്റ് ആചാരങ്ങളും നടത്തുന്നുണ്ട്. ഈ വലിയ പ്രതിമ നിർമിക്കുക എന്ന ദൗത്യം പൂർത്തീകരിക്കാൻ നിരവധി പേർ മുന്നോട്ടുവന്നു. ഹൈന്ദവ ധർമം സംരക്ഷിക്കുകയും ഈ ധർമം പിന്തുടരേണ്ടതിന്റെ പ്രാധാന്യത്തെക്കുറിച്ച് ഇന്നത്തെ തലമുറയെ ബോധവൽക്കരിക്കുകയും ചെയ്യുക എന്നതാണ് ലോകത്തിലെ ഏറ്റവും വലിയ ഹനുമാൻ വി​ഗ്രഹം നിർമിച്ചതിനു പിന്നിലെ ലക്ഷ്യം”, പ്രതിമ നിർമിക്കാൻ രൂപീകരിച്ച കമ്മിറ്റിയുടെ സ്ഥാപകനും സെക്രട്ടറിയുമായ ജയ് ശ്രീകാന്ത് സ്വാമി പറഞ്ഞു.