സി.സി .മുകുന്ദൻ എംഎൽഎയെ സിപിഐ പുറത്താക്കി; നടപടി സ്വതന്ത്ര സ്ഥാനാർഥിയാകുമെന്ന പ്രഖ്യാപനത്തിനു പിന്നാലെ

നാട്ടികയിൽ ഗീതാ ഗോപിയെ സ്ഥാനാർത്ഥിയായി പ്രഖ്യാപിച്ചതിന് പിന്നാലെ സിപിഐ നേതൃത്വത്തിനെതിരെ ഗുരുതരമായ ആരോപണങ്ങളാണ് മുകുന്ദൻ ഉന്നയിച്ചത്. നാട്ടികയിലേത് 'പേയ്‌മെന്റ് സീറ്റ്' ആണെന്ന് അദ്ദേഹം പരസ്യമായി ആക്ഷേപിച്ചു. കെ.സി. വേണുഗോപാലും രമേശ് ചെന്നിത്തലയും ഉൾപ്പെടെയുള്ള കോൺഗ്രസ് നേതാക്കളുമായി ചർച്ച നടത്തിയതായും അദ്ദേഹം വെളിപ്പെടുത്തി. ആവശ്യമെങ്കിൽ എംഎൽഎ സ്ഥാനം രാജിവെക്കുമെന്നും മുകുന്ദൻ വ്യക്തമാക്കിയിട്ടുണ്ട്.

പ്രാദേശിക നേതൃത്വവുമായുള്ള അകൽച്ചയും പാർട്ടി കമ്മിറ്റികളിലെ അസാന്നിധ്യവുമാണ് മുകുന്ദന് തിരിച്ചടിയായതെന്നാണ് സൂചന. നാട്ടിക, ചേർപ്പ് കമ്മിറ്റികൾ ഉന്നയിച്ച എതിർപ്പ് തൃശൂർ ജില്ലാ ഘടകം ശരിവെക്കുകയായിരുന്നു. സംസ്ഥാന നിർവാഹകസമിതി അംഗങ്ങൾ പ്രത്യേകമായി യോഗം ചേർന്നാണ് ഗീതാ ഗോപിയെ സ്ഥാനാർത്ഥിയായി ഉറപ്പിച്ചത്.