Vijayadashami 2025 |ഇന്ന് വിജയദശമി; കുരുന്നുകൾക്ക് വിദ്യാരംഭം, ക്ഷേത്രങ്ങളിൽ വൻ ഭക്തജനത്തിരക്ക്

വിദ്യയുടെ ദേവതയായ സരസ്വതി ദേവിയെ പൂജിച്ച ശേഷം കുട്ടികളെ എഴുത്തിനിരുത്തുന്ന വിദ്യാരംഭം ചടങ്ങുകൾ ഇന്ന് പുലർച്ചെ മുതൽ ആരംഭിച്ചു. ദക്ഷിണ മൂകാംബിക എന്നറിയപ്പെടുന്ന കോട്ടയം പനച്ചിക്കാട് ക്ഷേത്രം, എറണാകുളത്തെ ചോറ്റാനിക്കര ക്ഷേത്രം, കൊല്ലൂർ മൂകാംബിക ക്ഷേത്രം തുടങ്ങിയ പ്രസിദ്ധമായ എഴുത്തിനിരുത്ത് കേന്ദ്രങ്ങളിൽ ആയിരക്കണക്കിന് കുരുന്നുകളാണ് 'ഹരിശ്രീ' കുറിച്ച് അറിവിന്റെ ലോകത്തേക്ക് പ്രവേശിക്കുന്നത്. പാരമ്പര്യ എഴുത്താശാൻമാരും കവികളും സാഹിത്യകാരന്മാരുമാണ് ഇവിടെ കുരുന്നുകൾക്ക് അറിവിന്റെ ആദ്യാക്ഷരം പകർന്നു നൽകുന്നത്.

തിന്മയ്ക്ക് മേൽ നന്മ നേടിയ വിജയമായാണ് വിജയദശമി ദിനത്തെ വിശ്വാസികൾ കണക്കാക്കുന്നത്. ദുർഗ്ഗാദേവി മഹിഷാസുരനെ വധിച്ചതിന്റെ ഓർമ്മ കൂടിയാണ് ഈ ദിനം. വിദ്യാരംഭത്തിന് പുറമേ, വാദ്യ-നൃത്ത-സംഗീത കലകൾക്ക് തുടക്കം കുറിക്കാനും വിജയദശമി ദിനം ഉത്തമമായി കരുതപ്പെടുന്നു.