E-Waste | ഇ-മാലിന്യം: ഇന്ത്യ നേരിടുന്ന വെല്ലുവിളികൾ എങ്ങനെ പരിഹരിക്കാം? വി​ദ​ഗ്ധർ പറയുന്നതെന്ത്?

2019 വരെയുള്ള ആറ് വർഷത്തിനിടെ രാജ്യത്തെ ഇ-മാലിന്യത്തിൽ (E-Waste) 2.5 മടങ്ങ് വർധനവുണ്ടായതായി ഗ്ലോബൽ ഇ-വേസ്റ്റ് മോണിറ്ററിന്റെ റിപ്പോർട്ട്. 2020 ലെ റിപ്പോർട്ടിലാണ് ഇ-മാലിന്യം വർധിച്ച് 3.23 ദശലക്ഷം മെട്രിക് ടണ്ണിൽ എത്തിയതായി ചൂണ്ടിക്കാണിക്കുന്നത്. സാങ്കേതിക വിദ്യയുടെ വളർച്ചയോടൊപ്പം ഇലക്ട്രോണിക് ഉപകരണങ്ങളുടെ ഉപയോഗവും വർദ്ധിപ്പിച്ചു. ഉപഭോക്താക്കൾ കാലഹരണപ്പെട്ട ഉൽപന്നങ്ങൾ ഉപേക്ഷിക്കുന്നതും ഇ-മാലിന്യം കൂടാൻ കാരണമായി.

‌

ഇ-മാലിന്യം സുരക്ഷിതമായ സ്ഥലത്ത് സംഭരിക്കുകയോ ശാസ്ത്രീയ രീതിയിലൂടെ പുനരുപയോഗത്തിന് തയ്യാറാക്കുകയോ ചെയ്താൽ അവ ഹാനികരമാകില്ലെന്ന് വിദ​ഗ്ധർ പറയുന്നു. ലോഹങ്ങൾ, പോളിമറുകൾ, ഗ്ലാസ് തുടങ്ങിയ വിവിധ പദാർത്ഥങ്ങൾ ഇ-മാലിന്യങ്ങളുടെ കൂട്ടത്തിൽപെടും. അവ ശരിയായി സംസ്കരിച്ചില്ലെങ്കിൽ പരിസ്ഥിതിക്കും മനുഷ്യരുടെ ആരോഗ്യത്തിനും ഹാനികരവുമാണ്. ഇലക്ട്രിക് വാഹന വിപണിയുടെ വളർച്ചയും ഇ-മാലിന്യം കൂടുന്നതിന് കാരണമാകും.

ഇ-മാലിന്യവുമായി ബന്ധപ്പെട്ട ഇത്തരം പ്രശ്‌നങ്ങളെ കുറിച്ചും അവ എങ്ങനെ കൈകാര്യം ചെയ്യാമെന്നും മനസിലാക്കാൻ, ആറ്റെറോ റീസൈക്ലിംഗിന്റെ സിഇഒയും സഹസ്ഥാപകനുമായ നിതിൻ ഗുപ്തയുമായി ന്യൂസ് 18 സംസാരിച്ചു. അദ്ദേഹം പറഞ്ഞ ചില കാര്യങ്ങളാണ് ചുവടെ.

ഇ-മാലിന്യം എങ്ങനെ കൈകാര്യം ചെയ്യാം?

ഇ-മാലിന്യം കൈകാര്യം ചെയ്യുന്നതിനുള്ള ഏറ്റവും ഫലപ്രദമായ മാർഗം അത് സുസ്ഥിരമായ രീതിയിൽ, ഫലപ്രദമായി പുനരുപയോഗം ചെയ്യപ്പെടുന്നുവെന്ന് ഉറപ്പാക്കുക എന്നതാണ്. രാജ്യത്തെ ഇ-മാലിന്യത്തിന്റെ ഭൂരിഭാഗവും ഇപ്പോഴും ശേഖരിക്കുന്നതും കൈകാര്യം ചെയ്യുന്നതും അനൗദ്യോ​ഗിക മേഖലയാണ്. ഇ-മാലിന്യം ശരിയായ വിധത്തിൽ ശാസ്ത്രീയമായ രീതിയിൽ സംസ്കരിക്കപ്പെടുന്നു എന്നും പുനരുപയോഗം ചെയ്യപ്പെടുന്നുവെന്നും ഉറപ്പാക്കാൻ നടപടികൾ കൈക്കൊള്ളേണ്ടതുണ്ട്.

അന്താരാഷ്ട്ര മാതൃകകൾ

ഇ-മാലിന്യ സംസ്കരണ നയങ്ങൾ ഓരോ രാജ്യത്തിനും വ്യത്യസ്തമാണ്. ഇ-മാലിന്യം സംസ്കരിക്കുന്നതിനെക്കുറിച്ചുള്ള ശരിയായ അവബോധം പലർക്കും ഇല്ല എന്നതാണ് ഇന്ത്യ നേരിടുന്ന ഏറ്റവും വലിയ വെല്ലുവിളി. ഇ-മാലിന്യം സംസ്കരിക്കാൻ അനുയോജ്യമായ മാർ​ഗങ്ങൾ ഉണ്ടെന്ന് ഇന്നും പലർക്കും അറിയില്ല.

യൂറോപ്യൻ യൂണിയനിലെ ചില രാജ്യങ്ങൾ ഉൽപ്പാദിപ്പിക്കുന്ന ഇ-മാലിന്യത്തിന്റെ ഏതാണ്ട് 80 ശതമാനവും പുനരുപയോ​ഗപ്പെടുത്തുന്നുണ്ട്. നേരെമറിച്ച്, ഇന്ത്യയിലെ ഏതാണ്ട് 90 ശതമാനവും ഇ-മാലിന്യവും ഇപ്പോഴും കൈകാര്യം ചെയ്യുന്നത് അനൗദ്യോ​ഗിക മേഖലയാണ്.

ഇന്ത്യയിലെ ഇ-മാലിന്യ നിയമങ്ങൾ

2011 മുതൽ ഇ-മാലിന്യ സംസ്‌കരണത്തിന് പ്രത്യേക നിയമങ്ങൾ രാജ്യത്തുണ്ട്. ഇ മാലിന്യം സംബന്ധിച്ച നിയമങ്ങൾ നിലവിലുള്ള ദക്ഷിണേഷ്യയിലെ ഏക രാജ്യം കൂടിയാണ് ഇന്ത്യ. ഗതാഗതവും സംഭരണവും മുതൽ മാലിന്യത്തിന്റെ പുനരുപയോഗം വരെയുള്ള കാര്യങ്ങളെക്കുറിച്ച് ഈ നിയമത്തിൽ പറയുന്നുണ്ട്.

ഇലക്ട്രിക് വാഹനങ്ങളും ഇ-മാലിന്യവും

2030 ആകുമ്പോഴേക്കും 30 ശതമാനം സ്വകാര്യ ഇലക്ട്രോണിക് കാറുകളും 70 ശതമാനം വാണിജ്യ ഇലക്ട്രോണിക് വാഹനങ്ങളും നിരത്തിലിറക്കാനാണ് ഇന്ത്യ ലക്ഷ്യമിടുന്നത്. ഇവികളുടെയും മറ്റ് ഇലക്ട്രോണിക് ഉത്പന്നങ്ങളുടെയും ജനപ്രീതി കൂടുന്നതും ഇ-മാലിന്യം വർദ്ധിപ്പിക്കും.

ഇ-വേസ്റ്റ്, ലിഥിയം-അയൺ മാലിന്യങ്ങൾ എന്നിവ റീസൈക്കിൾ ചെയ്യാനും ബാറ്ററി സെല്ലുകൾക്ക് ആവശ്യമായ അസംസ്കൃത വസ്തുക്കൾ വിതരണം ചെയ്യാനും തങ്ങളുടെ കമ്പനിക്ക് സാധിക്കുമെന്നും 2022 അവസാനത്തോടെ, ഇ-മാലിന്യ സംസ്‌കരണ ശേഷി 3 ലക്ഷം മെട്രിക് ടണ്ണായി ഉയർത്താനാണ് കമ്പനി പദ്ധതിയിടുന്നതെന്നും നിതിൻ ഗുപ്ത ന്യൂസ് 18 നോട് പറഞ്ഞു.