Bluesky | ബ്ലൂ സ്കൈ ട്വിറ്ററിന് എതിരാളിയാകുമോ? പുതിയ സമൂഹമാധ്യമം ആരംഭിക്കാൻ ഒരുങ്ങി ട്വിറ്റർ സഹസ്ഥാപകൻ

ബ്ലൂ സ്‌കൈ എന്നാണ് ഈ പ്രൊജക്‌ടിന്റെ പേര്. ജാക്ക് ഡോർസി ട്വിറ്ററിന്റെ സിഇഒ ആയിരുന്നപ്പോഴാണ് പദ്ധതിയ്ക്ക് തുടക്കം കുറിച്ചത്. രണ്ട് ദിവസത്തിനുള്ളിൽ ആപ്പിൽ 30,000-ലധികം ആളുകൾ സൈൻഅപ്പ് ചെയ്തതോടെ പ്രൊജക്ട് ട്വിറ്ററിന് ബദലായോ മസ്‌ക്കിന്റെ ഉടമസ്ഥതയിലുള്ള ട്വിറ്ററിന്റെ പകരക്കാരനായോ ഉയർന്നു വന്നേക്കാം എന്നാണ് വിദഗ്ധരുടെ വിലയിരുത്തൽ.

ട്വിറ്ററിന്റെ പോരായ്മകൾക്കുള്ള പരിഹാരമായാണ് ബ്ലൂ സ്‌കൈ വിഭാവനം ചെയ്തത്. സോഷ്യൽ മീഡിയ നെറ്റ്‌വർക്കുകൾക്കെതിരെ ഡാറ്റ ദുരുപയോഗം, തെറ്റായ വിവരങ്ങൾ, തിരഞ്ഞെടുപ്പ് ഇടപെടൽ എന്നീ ആരോപണങ്ങൾ ഉയർന്ന സമയത്താണ് ഇത് പ്രഖ്യാപിച്ചത്. ഡൊണാൾഡ് ട്രംപിന്റെ വിലക്കിനെ ന്യായീകരിക്കുന്ന ഒരു ട്വിറ്റർ ത്രെഡിലാണ് ജാക്ക് ഡോർസി പദ്ധതി അവതരിപ്പിച്ചത്.

സോഷ്യൽ മീഡിയയ്‌ക്കായി ഒരു "വികേന്ദ്രീകൃത" പ്രോട്ടോക്കോൾ സൃഷ്ടിക്കാനാണ് ബ്ലൂസ്‌കൈ ലക്ഷ്യമിടുന്നത്. ഇമെയിൽ എങ്ങനെ പ്രവർത്തിക്കുന്നു എന്നത് പോലെയാകും ഇത്. വ്യത്യസ്‌ത ഇമെയിൽ സേവനം ഉപയോഗിക്കുന്ന ഒരാൾക്ക് നിങ്ങൾക്ക് മെയിൽ അയയ്‌ക്കാം, നിങ്ങളുടെ മെസേജും അറ്റാച്ച്‌മെന്റും അവിടെ ലഭിക്കുമെന്ന് ഉറപ്പുണ്ടായിരിക്കും. ഒരു നെറ്റ്‌വർക്കിലൂടെ കമ്പ്യൂട്ടറുകൾ എങ്ങനെ പരസ്പരം ആശയവിനിമയം നടത്തണം എന്നതിന് ഒരു പൊതു മാനദണ്ഡം നൽകുന്ന HTTP, TCP/IP പോലുള്ള സാങ്കേതിക നിയമങ്ങൾ ഉപയോഗിച്ചാണ് ഇമെയിൽ നിർമ്മിച്ചിരിക്കുന്നത്. സോഷ്യൽ മീഡിയ ആപ്ലിക്കേഷനുകൾക്കായി ഇത്തരമൊരും സംവിധാനം വികസിപ്പിക്കാനാണ് ബ്ലൂസ്‌കൈ ശ്രമിക്കുന്നത്.