കൊല്ലം നഗരത്തിലെ ശാന്തവും മനോഹരവുമായ ഒരു പാർക്ക്

കൊല്ലം ജില്ലയിൽ തിരക്കുകളിൽ നിന്ന് മാറി വിശ്രമിയ്ക്കാനായി ഒരു അടിപൊളി സ്ഥലമുണ്ട്. കൊല്ലം ആശ്രാമം മൈതാനത്തിന് സമീപം സ്ഥിതിചെയ്യുന്ന അഡ്വഞ്ചർ പാർക്ക്.1980ലാണ് ഈ പാർക്ക് സ്ഥാപിതമായത്. കൊല്ലം മുൻസിപ്പൽ കോർപ്പറേഷന്റെ പരിധിയിൽ വരുന്ന ഈ സ്ഥലം വളരെ ഭംഗിയുള്ളതാണ് . നഗര മധ്യത്തിൽ നിന്നും മാറി ഉള്ളിലേക്ക് സ്ഥിതി ചെയ്യുന്നത് പാർക്കിൽ, ദിവസേന നൂറ് കണക്കിന് ആളുകളാണ് എത്തുന്നത്. 30 രൂപയിൽ താഴെ മാത്രമാണ് ടിക്കറ്റ് നിരക്ക് . മറ്റു ചാർജുകൾ ഒന്നും തന്നെ ഇവിടെ ഇല്ല. പാർക്കിനുള്ളിൽ കുട്ടികൾക്ക് വിനോദത്തിനായുള്ള സജ്ജീകരണങ്ങളും വിശ്രമിക്കാനായുള്ള മണ്ഡപവും ഉണ്ട്. വളർന്നുനിൽക്കുന്ന മരങ്ങൾ വെയിൽ അരിച്ചിറങ്ങാതെ തണലും തണുപ്പും നൽകി സന്ദർശകർക്ക് ആശ്വാസം പകരുന്നു.