വിഴിഞ്ഞം തുറമുഖം; കേരളവികസനത്തിന് കാലം കാത്തുവെച്ച സ്വപ്‌ന പദ്ധതി

കേരളം ഏറെക്കാത്തിരുന്ന സ്വപ്നപദ്ധതിയായ വിഴിഞ്ഞം അന്താരാഷ്ട്ര തുറമുഖം യാഥാര്‍ത്ഥ്യമായിരിക്കുകയാണ്. ഇന്ത്യന്‍ പ്രധാനമന്ത്രി രാജ്യത്തിന് സമര്‍പ്പിക്കുന്ന ഈ വിജയഗാഥ നവകേരളത്തിന്റെ പുതുചരിത്രം സൃഷ്ടിക്കുകയാണ്.

ഇടതുമുന്നണി നേതൃത്വം നല്‍കിയ സര്‍ക്കാരുകളുടെയും ജാഗ്രതയോടുകൂടിയ നിരന്തര പോരാട്ടത്തിന്റെയും ഇടപടലുകളുടെയും വിജയമാണ് വിഴിഞ്ഞമെന്ന വിജയഗാഥ. വിഴിഞ്ഞം അന്താരാഷ്ട്ര തുറമുഖം എന്ന ആശയത്തിന് കേരളത്തില്‍ വിത്തുപാകുന്നത് 1996-ലെ ഇ.കെ. നായനാര്‍ സര്‍ക്കാരാണ്. അന്താരാഷ്ട്ര തുറമുഖം വിഴിഞ്ഞത്ത് നിര്‍മ്മിക്കുന്നതിനുവേണ്ടിയുള്ള ശാസ്ത്രീയപഠനത്തിന് അന്ന് സര്‍ക്കാര്‍ സമിതിയെ നിയോഗിക്കുകയായിരുന്നു. 2006 -ല്‍ ഇടതുപക്ഷ ജനാധിപത്യ മുന്നണിയുടെ നേതൃത്വത്തില്‍ വി.എസ്.അച്ചുതാനന്ദന്‍ സര്‍ക്കാര്‍ അധികാരത്തില്‍ വന്നു. വിഴിഞ്ഞം തുറമുഖ നിര്‍മ്മാണത്തിന്റെ തുടര്‍ച്ചെയന്ന നിലയില്‍ നടപടികളുമായി മുന്നോട്ട് നീങ്ങി. അന്ന് എം. വിജയകുമാര്‍ ആയിരുന്നു തുറമുഖ വകുപ്പ് മന്ത്രി. അദ്ദേഹത്തിന്റെ അദ്ധ്യക്ഷതയില്‍ ചേര്‍ന്ന യോഗത്തില്‍ 2010 ആഗസ്റ്റ് 11-ന് ആദ്യമായി തുറമുഖ കമ്പനി ഉദ്ഘാടനം ചെയ്തു. അതിന് ശേഷം ഉമ്മന്‍ചാണ്ടി സര്‍ക്കാര്‍ അധികാരത്തില്‍ വന്നു പക്ഷേ, തുറമുഖത്തിനായി ഒരു നടപടിയും സ്വീകരിച്ചില്ല. തുടര്‍ന്നാണ് വിഴിഞ്ഞം പദ്ധതിക്കു വേണ്ടിയുള്ള ശക്തമായ പ്രക്ഷോഭം എല്‍.ഡി.എഫ്. ആരംഭിക്കുന്നത്. ഒരു വികസനപദ്ധതി നടപ്പിലാക്കുന്നതിനുവേണ്ടി മനുഷ്യച്ചങ്ങല തീര്‍ത്തു. ഒരു വികസനപദ്ധതി നടപ്പിലക്കുന്നതിനുവേണ്ടി കേരളത്തില്‍ നടന്ന എറ്റവും ദൈര്‍ഘ്യമേറിയ സമരങ്ങളില്‍ ഒന്നായിരുന്നു ഇത്. പദ്ധതിക്കു വേണ്ടിയുള്ള സമരം തെരുവില്‍ മാത്രമായിരുന്നില്ല നിയമസഭയ്ക്കുള്ളിലും നടന്നു അതിനുശേഷമാണ് പേരിന് ഒരു തറക്കല്ല് ഇടീല്‍ നടന്നത്.

ദക്ഷിണേഷ്യയിലെ ആദ്യ സെമി ഓട്ടോമേറ്റഡ് തുറമുഖമായ വിഴിഞ്ഞം ഇന്ത്യയുടെ വാണിജ്യ കവാടമായി അതിവേഗം വളര്‍ന്നു കൊണ്ടിരിക്കുകയാണ്. 2024 ജൂലൈ 13 മുതലാണ് വിഴിഞ്ഞം തുറമുഖത്ത് ട്രയല്‍ അടിസ്ഥാനത്തില്‍ കപ്പലുകള്‍ വന്നു തുടങ്ങിയത്. 2024 ഡിസംബര്‍ 3 മുതല്‍ വാണിജ്യാടിസ്ഥാനത്തില്‍ പ്രവര്‍ത്തനം തുടങ്ങി. ഇതുവരെ 280 കപ്പലുകള്‍ എത്തിച്ചേര്‍ന്നു. ഇത്രയും സമയത്തിനുള്ളില്‍ 5.70 ലക്ഷം ടി.ഇ.യു (Twenty-foot Equivalent Unit- 20 അടി നീളമുള്ള ഒരു കണ്ടെയ്‌നറിന് തുല്യമാണ് ഒരു TEU, ഇത് അന്താരാഷ്ട്ര ഷിപ്പിംഗിൽ ഉപയോഗിക്കുന്ന ഒരു മാനകമാണ്) കൈകാര്യം ചെയ്ത് ലോകത്തെ വിസ്മയിപ്പിച്ചു മുന്നേറുകയാണ് വിഴിഞ്ഞം. 2025 ഫെബ്രുവരി, മാര്‍ച്ച് മാസങ്ങളില്‍ ഇന്ത്യയിലെ ദക്ഷിണ, പശ്ചിമ തീരത്തെ തുറമുഖങ്ങളില്‍ ചരക്കു നീക്കങ്ങളില്‍ വിഴിഞ്ഞമാണ് ഒന്നാം സ്ഥാനത്ത്. പ്രതിമാസം 1 ലക്ഷം ടി.ഇ.യു. കൈകാര്യം ചെയ്യുക എന്ന നേട്ടവും വിഴിഞ്ഞം സ്വന്തമാക്കി.

റോഡ്, റെയില്‍ കണക്റ്റിവിറ്റി പ്രാവര്‍ത്തികമാക്കി ചരക്ക് ഗതാഗതം സുഗമമാകുമ്പോള്‍ വിഴിഞ്ഞം അന്താരാഷ്ട്ര തുറമുഖം നമ്മുടെ നാടിന് മുന്‍പില്‍ വലിയ വികസന സാധ്യതകള്‍ തുറന്നിടും. രാജ്യത്തിന്റെ ചരക്കുനീക്കത്തിന്റെ വലിയൊരു ഭാഗം കൈകാര്യം ചെയ്യാന്‍ വിഴിഞ്ഞത്തിന് സാധിക്കും. ഇതോടെ സംസ്ഥാന സര്‍ക്കാരിന്റെ ഇടപെടലുകളിലുടെ വിഴിഞ്ഞം അന്താരാഷ്ട്ര തുറമുഖപദ്ധതി പൂര്‍ത്തിയാക്കി തുറമുഖം പൂര്‍ണ്ണ ശേഷി കൈവരിക്കുന്നതോടു കൂടി കേരളത്തില്‍ വലിയ തോതിലുള്ള വാണിജ്യ-വ്യാവസായിക വളര്‍ച്ചയുണ്ടാകും.

ഇന്ത്യയ്ക്ക് 7500 കിലോമീറ്റര്‍ തീരദേശം ഉണ്ട്. ഇവിടെ ഏതാണ്ട് 200 ഓളം തുറമുഖങ്ങളുമുണ്ട്. ഇതില്‍ 12 എണ്ണം കേന്ദ്രസര്‍ക്കാരിന് കീഴിലുള്ള മേജര്‍ തുറമുഖങ്ങളും ബാക്കിയുള്ളവ സംസ്ഥാന സര്‍ക്കാരുകളുടെ കീഴിലുള്ളവയുമാണ്. സമീപകാലത്ത് ഈ മേഖലയില്‍ വന്ന ഏറ്റവും വലിയ മാറ്റം സംസ്ഥാന തുറമുഖങ്ങളുടെ വളര്‍ച്ചയാണ്. ഇപ്പോള്‍ ഏതാണ്ട് 40 ശതമാനത്തിലധികം ചരക്ക് കൈകാര്യം ചെയ്യുന്നത് സംസ്ഥാന തുറമുഖങ്ങളാണ്. അവയില്‍ തന്നെ മുന്ദ്ര, കൃഷ്ണപട്ടണം, തുടങ്ങിയ തുറമുഖങ്ങള്‍ പല മേജര്‍ തുറമുഖങ്ങളെക്കാള്‍ ചരക്ക് കൈകാര്യം ചെയ്യുന്നുണ്ട്.

വിഴിഞ്ഞംപോലുള്ള തുറമുഖ പദ്ധതികളും റെയില്‍വേ, ഹൈവേ പദ്ധതികളും നടപ്പാക്കുകയും ഉല്‍പ്പാദന മേഖലയില്‍ വളര്‍ച്ചയ്ക്കുള്ള സൗകര്യം ഒരുക്കുകയും ചെയ്യുന്നതോടെ ഭാവിയിലെ അവസരങ്ങള്‍ മുതലെടുക്കാന്‍ നമ്മുടെ യുവ തലമുറയ്ക്ക് സാധിക്കും. ഷിപ്പിംഗ് മേഖലയിലുള്ള തൊഴില്‍ അവസരങ്ങള്‍ ഇന്ത്യയില്‍ മാത്രമല്ല, ലോകത്തെല്ലായിടത്തും പ്രവര്‍ത്തിക്കാന്‍ യുവാക്കള്‍ക്ക് സാഹചര്യമൊരുക്കുന്നതാണ്.