Gold Smuggling Case| സ്വർണക്കടത്തിൽ പേരുവന്ന നയതന്ത്ര പ്രതിനിധി പോയി; ഇനിയെന്ത്?

‌

ഇനി റാഷിദ് ഖാമിസ് അലി അൽ ഷമേലി തിരുവനന്തപുരത്തെ കോൺസുലേറ്റലുണ്ടായാലും രാജ്യത്തെ ഒരു അന്വേഷണ ഏജൻസിക്കും, എൻഐഎക്ക് പോലും പ്രത്യേകിച്ച് ഒന്നും ചെയ്യാനുമാകില്ല. ചോദ്യം ചെയ്യാൻ പോയിട്ട് സ്വന്തം നിലയ്ക്ക് ഒരു സൗഹൃദ കൂടികാഴ്ചയ്ക്ക് പോലും സാധിക്കില്ല. കൂടികാഴ്ചയ്ക്ക് അറ്റാഷെയുടെ സമ്മതം മതി പക്ഷെ ചോദ്യം ചെയ്യാൻ യുഎഇ അധികൃതരുടേയും വിദേശകാര്യമന്ത്രാലയത്തിന്റെയും സമ്മതം വേണം.

തിരുവനന്തപുരത്തെ കോൺസുലേറ്റിലെ അറ്റാഷെ തിരികെ പറന്നതിന് പിന്നിലും കാരണം ഇതു തന്നെ. ആ മടങ്ങിപ്പോക്കിനെ യുഎഇ അധികാരികൾ എതിർക്കാതിരുന്നതും അതുകൊണ്ട് തന്നെ. റാഷിദ് ഖാമിസ് അലി അൽ ഷമേലി ഇന്ത്യയിലുണ്ടായിരുന്നപ്പോൾ അദ്ദേഹത്തെ ചോദ്യം ചെയ്യാൻ കേന്ദ്ര വിദേശകാര്യ മന്ത്രാലയം വഴി എൻഐഎ ശ്രമിക്കാതിരുന്നത് എന്തുകൊണ്ടാണ്. ഇന്ത്യയും യുഎഇയും തമ്മിലുള്ള നല്ല ബന്ധം ഇതിനായി പ്രയോജനപ്പെടുത്താമായിരുന്നു. ഒരു അറ്റാഷെയ്ക്ക് വേണ്ടി ആ നല്ല ബന്ധത്തിൽ വിള്ളൽ വീഴാതിരിക്കാൻ യുഎഇക്ക് മേൽകേന്ദ്രസർക്കാരിന് സമ്മർദ്ദം ചെലുത്താനാകുമായിരുന്നു.

പക്ഷേ തുടക്കത്തിലെ കേന്ദ്ര വിദേശകാര്യ മന്ത്രാലയം സ്വീകരിച്ച നിലപാട് വ്യത്യസ്തമയിരുന്നു. സ്വർണ്ണം കടത്തിയത് ഡിപ്ലോമാറ്റിക് ചാനലിലൂടെയല്ലെന്ന വാദമാണ് വിദേശകാര്യ സഹമന്ത്രി വി.മുരളീധരൻ ഉയർത്തിയത്. കേന്ദ്രസഹമന്ത്രിയുടെ നിലപാടാണ് എൻഐഎക്കും. യുഎഇ കോൺസുലേറ്റിനും നയതന്ത്ര പ്രതിനിധികൾക്കും ഈ കടത്തിൽ ബന്ധമില്ലെന്നാണ് എൻഐഎയുടെ വാദം.

രേഖകളെല്ലാം കൃത്രിമമായി ഉണ്ടാക്കിയത്. ആ വാദം പക്ഷേ തൽക്കാലം കസ്റ്റംസ് അംഗീകരിക്കുന്നില്ല. അറ്റാഷെയുടെ പേരിൽ സ്വർണ്ണം വന്നത് നയതന്ത്ര ബാഗേജിൽ തന്നെയാണെന്നാണ് കസ്റ്റംസ് ഇപ്പോഴും വാദിക്കുന്നത്. സീലുകൾ വ്യാജമായിരുന്നില്ല. അറ്റാഷെ സ്വന്തം കൈപ്പടയിലാണ് കത്ത് ഒപ്പിട്ട് നൽകിയത്. ഇതിലും വലിയ തെളിവ് വേറെ വേണ്ടെന്നും അവർ വാദിക്കുന്നു. രണ്ടും കേന്ദ്ര ഏജൻസികൾ. അവർ പിന്നീട് ഒരേ സ്വരത്തില്‍ സംസാരിക്കുമായിരിക്കും. അപ്പേഴേക്കും അറ്റാഷെയും കോൺസുലേറ്റുമെല്ലാം ഒരുപക്ഷെ അപ്രസക്തവുമാകും. കാരണം രാജ്യദ്രോഹം ഇതിനെക്കാളൊക്കെ പ്രാധാന്യം നൽകേണ്ട, പ്രാധാന്യം അർഹിക്കുന്ന വലിയ കുറ്റമാണ്. അത് ചെയ്തവരെ അപ്പോഴേക്കും എൻഐഎ കസ്റ്റഡിയിൽ എടുത്തിട്ടുമുണ്ടാകും.