വിഡി പ്രതിപക്ഷ നേതാവ്; ഐയും എയും ചേര്‍ന്ന് ഇനി 'ഐഎ' ഗ്രൂപ്പ്

രമേശ് ചെന്നിത്തലയ്‌ക്കൊപ്പം ഉറച്ച് നിന്നിരുന്ന കെ സുധാകരന്‍ ഐ ഗ്രൂപ്പിലെ ഉപഗ്രൂപ്പ് നേതാവായതും പിന്നെ ഗ്രൂപ്പിന് അപ്പുറത്തായതുമെല്ലാം ഇക്കാലത്താണ്. ഐ ഗ്രൂപ്പിന്റെ തീരുമാനങ്ങള്‍ അറിയാന്‍ വി ഡി സതീശനോട് ചോദിച്ചാലും മതിയെന്ന് രമേശ് ചെന്നിത്തല തന്നെ ഗ്രൂപ്പുകാരോട് പറഞ്ഞിരുന്ന കാലവുമുണ്ടായിരുന്നു. അവിടെ നിന്നാണ് പ്രതിപക്ഷ നേതൃസ്ഥാനത്തേക്ക് പരസ്പരം മത്സരിക്കുന്ന തലത്തിലേക്ക് ഇരുവരും എത്തിയതും വി ഡി സതീശന്‍ പഴയ നേതാവിനെ മലര്‍ത്തിയടിച്ചതും. ഐ ഗ്രൂപ്പില്‍ ഒപ്പമുണ്ടായിരുന്നവരില്‍ ചിലരാണ് വി ഡിക്ക് വേണ്ടി ചരട് വലിച്ചത്. അവരാണ് മറ്റു ഗ്രൂപ്പുകളിലെ ചെറുപ്പക്കാരെ ഒന്നിപ്പിച്ച് ഹൈക്കമാൻഡിന് മുന്നില്‍ അണിനിരത്തിയതും.

വയലാര്‍ രവി കത്തിനിന്നപ്പോള്‍ ഉണ്ടായ ഗ്രൂപ്പ് ഇപ്പോഴില്ല. അദ്ദേഹത്തെ പിന്തുണച്ച് അന്ന് ഒപ്പമുണ്ടായിരുന്നവര്‍ ഇന്ന് മുതിര്‍ന്ന നേതാക്കളായി. അതുകൊണ്ട് അവര്‍ മാറി നിന്ന് ചര്‍ച്ചകളില്‍ കുറ്റവും കുറവും നിരത്തുന്നു. ഇങ്ങനെ എല്ലാകാലത്തും ഗ്രൂപ്പ് തന്നെയാണ് കോണ്‍ഗ്രസിനെ വളര്‍ത്തിയതും തളര്‍ത്തിയതും. എന്നാല്‍ ഇത്തവണ അതല്ല കഥ. രമേശ് ചെന്നിത്തലയെ പ്രതിപക്ഷ നേതൃസ്ഥാനത്ത് നിലനിറുത്താനും നീക്കാനും ഗ്രൂപ്പ് മറന്നുള്ള ശ്രമങ്ങളുണ്ടായി. കോണ്‍ഗ്രസിലെ ഗ്രൂപ്പ് കളികളുടെ തമ്പുരാന്‍ സാക്ഷാല്‍ ഉമ്മന്‍ ചാണ്ടി തന്നെ രമേശ് ചെന്നിത്തലയ്ക്ക് അനുകൂലമായി രംഗത്തിറങ്ങി. ഹൈക്കമാൻഡ് വൃത്തങ്ങളെ പതിവ് പോലെ വരും വരായ്കകള്‍ പറഞ്ഞ് ഭയപ്പെടുത്തി. ഘടകകക്ഷികളെ ഒപ്പം നിറുത്തി എല്ലാ അടവുകളും പയറ്റി. ചെറുപ്പക്കാരായ എംഎല്‍എമാരെ രംഗത്തിറക്കി മറുഭാഗം അതിലും വലിയ കളികളിച്ചു. ഒടുവില്‍ ചെറുപ്പക്കാര്‍ വിജയിച്ചു. ചുവരെഴുത്ത് വായിക്കാന്‍ ഉമ്മന്‍ ചാണ്ടിക്കും രമേശ് ചെന്നിത്തലയക്കും ഒപ്പം നിന്ന എ, ഐ ഗ്രൂപ്പ് നേതാക്കള്‍ക്കും കഴിഞ്ഞില്ല. പക്ഷെ കളി അവസാനിക്കുന്നില്ല.

മറുഭാഗത്ത് ഗ്രൂപ്പ് തര്‍ക്കം അവസാനിപ്പിച്ചല്ല ഐയും എയും കൈകോര്‍ത്തതും. പ്രതിപക്ഷ നേതൃസ്ഥാനത്ത് രമേശ് ചെന്നിത്തലയെ നിലനിറുത്തിയാല്‍ കെപിസിസി പ്രസിഡന്റ് സ്ഥാനം ലഭിക്കുമെന്ന് എ ഗ്രൂപ്പ് കണക്ക് കൂട്ടി. എന്നാല്‍ കെപിസിസി പ്രസിഡന്റ് സ്ഥാനത്തേക്ക് ഉമ്മന്‍ ചാണ്ടിയുടെ മനസിലുള്ള പേരു കേട്ട പല യുവ എ ഗ്രൂപ്പ് നേതാക്കളും ഞെട്ടി. അങ്ങനെയാണ് അവര്‍ വി ഡി സതീശനെ പിന്തുണയ്ക്കാന്‍ തീരുമാനിച്ചത് എന്നാണ് കെപിസിസിയിലെ അടക്കം പറച്ചില്‍.

ആ ഉമ്മന്‍ ചാണ്ടിയുടെ ചാണക്യ തന്ത്രങ്ങള്‍ക്ക് പോലും പ്രതിപക്ഷ നേതൃസ്ഥാനത്ത് രമേശ് ചെന്നിത്തലയെ ഉറപ്പിച്ചിരുത്താനായില്ല. കെപിസിസി പ്രസിഡന്റ് തെരഞ്ഞെടുപ്പ് കൂടി കഴിയുന്നതോടെ ഈ രണ്ട് നേതാക്കളും അവര്‍ക്കൊപ്പം നില്‍ക്കുന്ന നേതാക്കളും കൂടുതല്‍ ഒറ്റപ്പെടുമെന്നാണ് സതീശന്‍, സുധാകരന്‍, കെ സി വേണുഗോപാല്‍ ക്യാമ്പുകളിലെ സംസാരം. ഐ, എ ഗ്രൂപ്പുകളില്‍ ഇവരെ പിന്തുണയ്ക്കുന്നവര്‍ ചേർന്ന 'അയ്യേ' ഗ്രൂപ്പാകുമെന്നാണ് ഇവരുടെ പരിഹാസം. പ്രസക്തി നഷ്ടപ്പെടുന്ന നേതാക്കളായി മാറുകയാണോ ഉമ്മന്‍ ചാണ്ടിയും രമേശ് ചെന്നിത്തലയും? ചാവേറുകളെ പോലെ ഗ്രൂപ്പ് ഉമ്മന്‍ചാണ്ടിക്കൊപ്പം ഉറച്ച് നിന്ന കാലമൊക്കെ കടന്നുപോയി. ആ പ്രതാപം തിരിച്ചു പിടിക്കാനുള്ള ആരോഗ്യവും അദ്ദേഹത്തിന് ഇന്നില്ല. അതേസമയം കേരളത്തില്‍ നിന്ന് ഡല്‍ഹിക്ക് വിമാനം പിടിച്ച നേതാക്കളുടെ വഴി രമേശ് ചെന്നിത്തലയ്ക്ക് മുന്നില്‍ ഇപ്പോഴും തുറന്ന് തന്നെ കിടക്കുകയാണ്.