മെസിയെ പിന്നിലാക്കി വീണ്ടും ക്രിസ്റ്റ്യാനോ റൊണാൾഡോ; വിരാട് കോലി പതിനൊന്നാമത്

ഗോളടിയിൽ മാത്രമല്ല, അംഗീകാരങ്ങളും ബഹുമതികളും സ്വന്തമാക്കുന്ന കാര്യത്തിലും മൽസരത്തിലാണ് റൊണാൾഡോയും മെസിയും. ഇപ്പോഴിതാ, പ്രമുഖ സ്പോർട്സ് ചാനലായ ഇ എസ് പി എൻ പുറത്തുവിട്ട ഏറ്റവും പ്രശസ്തരായ കായികതാരങ്ങളും പട്ടികയിലും ഈ മൽസരം കാണാം. ലയേണൽ മെസിയെ മൂന്നാം സ്ഥാനത്തേക്ക് പിന്തള്ളി ക്രിസ്റ്റ്യാനോ റൊണാൾഡോ ഒന്നാമതെത്തി. തുടർച്ചയായ രണ്ടാം തവണയാണ് റൊണാൾഡോ ഈ പട്ടികയിൽ ഒന്നാമതെത്തുന്നത്. അമേരിക്കൻ ബാസ്ക്കറ്റ് ബോളിലെ സൂപ്പർ താരം ലെബ്രോൻ ജെയിംസാണ് രണ്ടാം സ്ഥാനത്ത്. ഇന്ത്യൻ ക്രിക്കറ്റ് ടീം ക്യാപ്റ്റൻ വിരാട് കോലി പതിനൊന്നാമതാണ്. നെയ്മറും റോജർ ഫെഡററുമാണ് നാലും അഞ്ച് സ്ഥാനങ്ങളിലുള്ളത്. പ്രശസ്ത കായികതാരങ്ങളായ നൂറുപേരുടെ പട്ടികയാണ് ഇ എസ് പി എൻ പുറത്തുവിട്ടത്.