Virat Kohli Birthday | 'ജീവിതത്തിലെ എല്ലാ വേഷങ്ങളിലും അസാധാരണ വ്യക്തിത്വം' പ്രിയതമന്‍റെ ജന്മദിനത്തിൽ ഹൃദയസ്പർശിയായ കുറിപ്പുമായി അനുഷ്ക ശർമ്മ

സമകാലീന ക്രിക്കറ്റിലെ ഏറ്റവും മികച്ച ബാറ്റർമാരിൽ ഒരാളാണ് വിരാട് കോഹ്ലി. ആരാധകർ GOAT എന്ന് വിശേഷിപ്പിക്കുന്ന വിരാട് കോഹ്ലിയുടെ 35-ാം ജന്മദിനമാണ് ഇന്ന്. ഇന്ത്യൻ ക്രിക്കറ്റിലെ മാസ്റ്റർ ബ്ലാസ്റ്റർ സച്ചിൻ ടെൻഡുൽക്കർ സ്ഥാപിച്ച റെക്കോർഡുകളുടെ പിന്നാലെയാണ് കോഹ്ലിയുടെ പ്രയാണവും.

ഇന്ത്യയുടെ വിജയങ്ങളിൽ നിർണായക പങ്കുവഹിക്കുന്ന കോഹ്ലി സെഞ്ച്വറികളുടെയും റൺസിന്‍റെയും കാര്യത്തിൽ പുതിയ റെക്കോർഡുകൾ സ്ഥാപിച്ച് മുന്നേറുകയാണ്. പ്രത്യേകിച്ചും രണ്ടാമത് ബാറ്റ് ചെയ്യുമ്പോൾ മികച്ച റെക്കോർഡാണ് താരത്തിന് ഉള്ളത്.

ഡൽഹിയിൽ ജനിച്ച മുൻ ഇന്ത്യൻ നായകൻ കൂടിയായ കോഹ്ലിക്ക് ഹൃദയസ്പർശിയായ ജന്മദിനാശംസകളുമായി രംഗത്തെത്തിയിരിക്കുകയാണ് അദ്ദേഹത്തിന്റെ ഭാര്യയും ബോളിവുഡ് താരവുമായ അനുഷ്ക്ക ശർമ്മ.

"അദ്ദേഹം തന്റെ ജീവിതത്തിലെ എല്ലാ റോളുകളിലും അക്ഷരാർത്ഥത്തിൽ അസാധാരണ വ്യക്തിത്വമാണ്! അദ്ദേഹത്തിന്‍റെ മഹത്തരമായ തൊപ്പിയിലേക്ക് കൂടുതൽ തൂവലുകൾ ചേർക്കുന്നത് തുടർന്നുകൊണ്ടേയിരിക്കുന്നു, ഈ ജീവിതത്തിലൂടെയും അതിനപ്പുറവും അനന്തമായി ഞാൻ നിന്നെ സ്നേഹിക്കുന്നു. @virat.kohli," അനുഷ്ക്ക ശർമ്മ തന്റെ ഇൻസ്റ്റാഗ്രാം പോസ്റ്റിന് അടിക്കുറിപ്പ് നൽകി.

ഈ ലോകകപ്പിലും തകർപ്പൻ ഫോമിലാണ് വിരാട് കോഹ്ലി. ഇതുവരെ ഒരു സെഞ്ചുറിയും നാല് അര്‍ധസെഞ്ചുറികളും നേടിക്കഴിഞ്ഞു. ഓസ്ട്രേലിയ, അഫ്ഗാനിസ്താൻ, ബംഗ്ലദേശ്, ന്യൂസിലൻഡ്, ശ്രീലങ്ക എന്നിവർക്കെതിരെ മികച്ച ബാറ്റിങ്ങാണ് കോഹ്ലി പുറത്തെടുത്തത്.