വിവാഹദിനത്തിൽ വധു മരിച്ചു, സഹോദരിയെ വിവാഹം കഴിപ്പിച്ചയച്ച് വീട്ടുകാർ

സന്തോഷത്തോടെ മകളെ കൈപിടിച്ചയക്കാൻ കാത്തിരുന്ന കുടുംബത്തിന് മുന്നിലേക്കെത്തിയത് അവളുടെ ചേതനയറ്റ ശരീരം, അതും വിവാഹ ദിനത്തിൽ. വിവാഹത്തിന് മിനിറ്റുകൾ ശേഷിക്കെ വധു മരണപ്പെടുകയായിരുന്നു. എന്നാൽ ദുഃഖത്തിനിടെയും ഉറപ്പിച്ച വാക്ക് പാലിക്കാൻ വധുവിന്റെ കുടുംബം അവളുടെ സഹോദരിയെ വിവാഹം ചെയ്യിച്ചു

വിവാഹത്തിന്റെ ഭാഗമായുള്ള സംഗീതം ഉയരുന്നതിനിടെയാണ് വധു അസ്വസ്ഥത പ്രകടിപ്പിച്ചത്. ഉടനെ കുഴഞ്ഞ് വീണു. ഉടനടി 108ൽ വിളിച്ച് ആംബുലൻസിൽ ആശുപത്രിയിലേക്ക് കൊണ്ടുപോയെങ്കിലും മരണം സംഭവിച്ചിരുന്നു. ഹൃദയാഘാതമാണ് മരണകാരണം (തുടർന്ന് വായിക്കുക)

ഗുജറാത്തിലെ ഭാവ്നഗറിലാണ് നാടിനെ കണ്ണീരിലാഴ്ത്തിയ സംഭവം അരങ്ങേറിയത്. എന്നാൽ ഉറപ്പിച്ച കല്യാണം മുടങ്ങാതിരിക്കാൻ, വധുവിന്റെ ബന്ധുക്കളും വീട്ടുകാരും ഉടനെ ഒത്തുകൂടി, സഹോദരിയെ വിവാഹം കഴിപ്പിക്കാൻ തീരുമാനം എടുക്കുകയായിരുന്നു

ജിനാഭായ് എന്നയാളുടെ മകളാണ് മരിച്ചത്. സഹോദരിയുടെ വിവാഹം കഴിയും വരെ മൃതദേഹം മോർച്ചറിയിൽ സൂക്ഷിച്ചു. ഉച്ചത്തിൽ ശബ്ദമുള്ള സംഗീതത്തിന്റെ അകമ്പടിയുള്ള ഇത്തരം വിവാഹച്ചടങ്ങുകളിൽ ഹൃദയാഘാതം സംഭവിക്കുക പതിവായി മാറിയിട്ടുണ്ട്

കുടുംബം മാത്രമല്ല, വിവാഹത്തിൽ പങ്കെടുത്ത നാട്ടുകാരും അയൽക്കാരും കണ്ണീരോടെയാണ് മടങ്ങിയത്. ശേഷം യുവതിയുടെ മരണാനന്തര ചടങ്ങുകൾ നടത്തി

മകളുടെ മരണം ഏൽപ്പിച്ച ആഘാതത്തിൽ നിന്നും കുടുംബം മുക്തരായിട്ടില്ല എന്നും, നടന്നതെല്ലാം അത്യന്തം ഖേദകരമാണെന്നും മാൽധാരി സമാജം നേതാവ് ലക്ഷ്മൻഭായ് റാത്തോഡ് മാധ്യമങ്ങളോട് പറഞ്ഞു