ഗോൾപോസ്റ്റിനുള്ളിൽ ഒരു വിവാഹവേദി; ആശിർവദിക്കാൻ 'മെസിയും റൊണാൾഡോയും നെയ്മറും'

അർജന്റീനിയൻ സൂപ്പർ താരം ലയണല്‍ മെസിയുടെ ജന്മദിനത്തില്‍ ആശംസ നേരാന്‍ മത്സരിക്കുകയായിരുന്നു ആരാധകര്‍. സോഷ്യല്‍ മീഡിയ ഈ ജന്‍മദിനം ഏറ്റെടുക്കുകയും ചെയ്തു. സ്വന്തം വിവാഹവേദി മെസി മയമാക്കിയാണ് ആലപ്പുഴ സ്വദേശിയായ യുവാവ് പ്രിയ താരത്തോടുള്ള ഇഷ്ടം പ്രകടിപ്പിച്ചത്.

ആലപ്പുഴ തുമ്പോളിയിലെ ഒരു വിവാഹവേദിയാണ് സോഷ്യൽമീഡിയയിൽ വൈറലായിരിക്കുന്നത്. നാട്ടിലെ ഫുട്‌ബോള്‍ താരവും മെസിയുടെ ആരാധകനുമായ ഷിബു തന്റെ വിവാഹത്തിനായി തീരുമാനിച്ചത് മെസിയുടെ ജന്മദിനം.

ക്ഷണക്കത്തുമുതല്‍ ഫുട്‌ബോള്‍ മയമാണ്. പന്തലിലേക്ക് എത്തിയ വധൂവരന്‍മാര്‍ക്ക് നല്‍കിയതും ഫുട്‌ബോള്‍ സ്വീകരണം.

ഗോള്‍ പോസ്റ്റിനുള്ളില്‍ ഇരിപ്പിടമൊരുക്കിയ വിവാഹവേദിയില്‍ മെസ്സി, നെയ്മര്‍, റൊണാള്‍ഡോ, തുടങ്ങിയ ലോകതാരങ്ങള്‍ക്കൊപ്പം ഐ എം വിജയന്‍, ബൂട്ടിയ, സന്ദേശ് ജിംഗാന്‍ എന്നിവരുടെ കട്ടൗട്ടുകൾ.

വരന്‍ ഷിബുവിന്റെ ഫുട്‌ബോള്‍ ആരാധന അടുത്തറിയാവുന്ന സുഹൃത്തുക്കളാണ് ഈ ഒരുക്കങ്ങള്‍ക്ക് പിന്നില്‍. പുന്നപ്ര സ്വദേശി ജീനയെ സ്വന്തമാക്കിയാണ് ഷിബു ദാമ്പത്യത്തിന്റെ ഗോള്‍ നേടിയത്.