ആര്‍ഡിഎക്സ് സംവിധായകന്‍ നഹാസ് ഹിദായത്ത് വിവാഹിതനായി; വധു ഷെഫ്ന

ആര്‍ഡിഎക്സ് സിനിമ സംവിധായകന്‍ നഹാസ് ഹിദായത്ത് വിവാഹിതനായി. കാഞ്ഞിരപ്പള്ളി സ്വദേശിനി ഷെഫ്നയാണ് വധു. അടുത്ത സുഹൃത്തുക്കളും ബന്ധുക്കളും പങ്കെടുത്ത വിവാഹ ചടങ്ങിന്‍റെ ചിത്രങ്ങള്‍ സോഷ്യല്‍ മീഡിയയിലൂടെ പുറത്തുവന്നു.

ഒപ്റ്റോമെട്രി വിദ്യാര്‍ഥിയാണ് ഷെഫ്ന. കഴിഞ്ഞ വര്‍ഷം ഡിസംബറിലായിരുന്നു ഇരുവരുടെയും വിവാഹനിശ്ചയം. സിനിമ മേഖലയിലെ സുഹൃത്തുക്കള്‍ക്കായി കാഞ്ഞിരപ്പള്ളിയില്‍ വിവാഹ സത്കാരം സംഘടിപ്പിച്ചിട്ടുണ്ട്. 

ഗോദ എന്ന ചിത്രത്തിലൂടെ ബേസിൽ ജോസഫിന്റെ അസിസ്റ്റന്റ് ആയാണ് നഹാസ് സിനിമയിൽ എത്തുന്നത്. ആദ്യ ചിത്രം തന്നെ 100 കോടി ക്ലബ്ബിലെത്തിച്ച സംവിധായകന്‍ വിശേഷണവും നഹാസിന് ഇതിലൂടെ ലഭിച്ചു

ഷെയ്ൻ നി​ഗം, ആന്റണി വർ​ഗീസ്, നീരജ് മാധവ് എന്നിവർ പ്രധാന വേഷത്തിലെത്തിയ ചിത്രം 100 കോടി ക്ലബ്ബിൽ ഇടംനേടിയിരുന്നു. ​2023ലെ സര്‍പ്രൈസ് ഹിറ്റ് അടിച്ച ചിത്രം ഒരു അത്യുഗ്രന്‍ ആക്ഷന്‍ സിനിമയായാരുന്നു.

വീക്കെന്‍ഡ് ബ്ലോക്ബസ്റ്റേഴ്സ് നിര്‍മ്മിച്ച ചിത്രത്തില്‍ മഹിമ നമ്പ്യാര്‍ ആയിരുന്നു നായിക. ആദർശ് സുകുമാരൻ, ഷാബാസ് റഷീദ് എന്നിവര്‍ ചേര്‍ന്നാണ് ആര്‍ഡിഎക്സിന് തിരക്കഥ ഒരുക്കിയത്.

ഐമ റോസ്മി സെബാസ്റ്റ്യന്‍,  ബാബു ആന്‍റണി, പാര്‍വതി മാല, ലാല്‍ തുടങ്ങി ഒട്ടനവധി താരങ്ങള്‍ അണിനിരന്നിരുന്നു. സൗഹൃദവും പ്രണയവും പ്രതികാരവുമൊക്കെ അടങ്ങിയ ചിത്രം പ്രേക്ഷകര്‍ വലിയ രീതിയില്‍ ഏറ്റെടുത്തു