'ദൈവത്തിന്റെ സമ്മാനം'; 53ാം വയസ്സിൽ വീണ്ടും അമ്മയായി സൂപ്പർ മോഡൽ നവോമി കാംബെൽ

53ാം വയസ്സിൽ ആൺകുഞ്ഞിന്റെ അമ്മയായി സൂപ്പർ മോഡലും ടെലിവിഷൻ താരവുമായ നവോമി കാംബെൽ. വ്യാഴാഴ്ച്ചയാണ് സോഷ്യൽമീഡിയയിലൂടെ താൻ രണ്ടാമതും അമ്മയായ സന്തോഷ വാർത്ത നവോമി പങ്കുവെച്ചത്.

ദൈവത്തിന്റെ സമ്മാനം എന്നാണ് കുഞ്ഞിനെ നവോമി വിശേഷിപ്പിച്ചത്. 2021 ൽ അമ്പതാമത്തെ വയസ്സിലായിരുന്നു നവോമിക്ക് പെൺകുഞ്ഞ് ജനിച്ചത്. അമ്മയാകാൻ പ്രായം ഒരു തടസ്സമല്ലെന്ന് പ്രഖ്യാപിച്ചാണ് രണ്ടാമത്തെ കുഞ്ഞിനേയും നവോമി വരവേറ്റത്.

അതേസമയം, ഗർഭിണിയായിരുന്നോ അതോ വാടക ഗർഭധാരണമായിരുന്നോ എന്ന കാര്യം താരം വെളിപ്പെട്ടിത്തിയിട്ടില്ല. രണ്ട് വയസ്സുള്ള മകളുടെ പേരും ഇതുവരെ നവോമി വെളിപ്പെടുത്തിയിട്ടില്ല.

2022 ൽ ബ്രിട്ടീഷ് വോഗിന്റെ കവർ ഫോട്ടോയിൽ ഒമ്പത് മാസം പ്രായമുള്ള മകൾക്കൊപ്പമുള്ള നവോമിയുടെ ചിത്രങ്ങൾ ഏറെ ശ്രദ്ധിക്കപ്പെട്ടിരുന്നു. അമ്പതാമത്തെ വയസ്സിൽ കുഞ്ഞിന്റെ അമ്മയായത് അന്ന് തന്നെ ചർച്ചയായിരുന്നു.

അടുത്തിടെയാണ് ഹോളിവുഡ് താരം അൽ പച്ചീനോയ്ക്ക് 83ാം വയസ്സിൽ കുഞ്ഞ് പിറന്നത് വലിയ വാർത്തയായിരുന്നു. ഇതിനു പിന്നാലെയാണ് നവോമി കാംബെലും വാർത്തകളിൽ ഇടം പിടിക്കുന്നത്.

15ാം വയസ്സിലാണ് നവോമി മോഡലിംഗ് രംഗത്ത് എത്തുന്നത്. ടൈം, വോഗ് ഫ്രാൻസ്, ബ്രീട്ടീഷ് വോഗ് എന്നിവയുടെ കവർ മോഡലാകുന്ന ആദ്യ കറുത്ത വംശജ കൂടിയാണ് നവോമി.