19-ാം വയസിൽ 12 കോടി സമ്പാദ്യം; ഐശ്വര്യ റായിയെ ഡേറ്റ് ചെയ്ത നടൻ; 10 വർഷംകൊണ്ട് പാവങ്ങൾക്കായി സംഭാവന ചെയ്തത് 358 കോടി രൂപ!

'വിവേഗം' എന്ന തമിഴ് ചിത്രത്തിൽ അജിത്തിന്റെ വില്ലനായി അഭിനയിച്ച് തെന്നിന്ത്യൻ പ്രേക്ഷകരുടെ ശ്രദ്ധ നേടിയ നടനാണ് വിവേക് ഒബ്‌റോയ് (Vivek Oberoi). പ്രശസ്ത നടൻ സുരേഷ് ഒബ്‌റോയിയുടെ മകനായ വിവേക് തമിഴ്, തെലുങ്ക്, മലയാളം സിനിമകളിലെത്തുന്നതിന് മുൻപ് ബോളിവുഡിലെ മുൻനിര താരമായിരുന്നു.

'കമ്പനി' എന്ന ചിത്രത്തിലൂടെയായിരുന്നു അദ്ദേഹത്തിൻ്റെ വിജയകരമായ അരങ്ങേറ്റം. തുടർന്ന് സാഥിയ, യുവ, ഓംകാര, ഷൂട്ട് ഔട്ട് അറ്റ് ലോഖണ്ഡ്‌വാല, കുർബാൻ തുടങ്ങിയ ചിത്രങ്ങളിലൂടെ അദ്ദേഹം ജനപ്രിയനായി.

2003-ൽ വിവേകിന്റെ കരിയറിൽ വലിയ വഴിത്തിരിവുണ്ടായി. സൽമാൻ ഖാനുമായുള്ള ബന്ധം വേർപെടുത്തിയ ശേഷം ഐശ്വര്യ റായ് വിവേകുമായി ഡേറ്റിംഗിലാണെന്ന വാർത്തകൾ പുറത്തുവന്നിരുന്നു. ഈ സമയത്താണ് സൽമാൻ ഖാൻ തന്നെ ഭീഷണിപ്പെടുത്തിയതായി ആരോപിച്ച് വിവേക് ഒരു പത്രസമ്മേളനം വിളിച്ചത്.

ഈ പത്രസമ്മേളനത്തിന് ശേഷം വിവേകിന് സിനിമകളിൽ അവസരം കുറഞ്ഞു. ചില വർഷങ്ങളിൽ ഒരു സിനിമയിൽ മാത്രമായി ഒതുങ്ങിയ അദ്ദേഹത്തിന് ഒരു ഘട്ടത്തിൽ മൂന്ന് വർഷത്തോളം സിനിമകൾ ലഭിക്കാത്ത അവസ്ഥയുമുണ്ടായി.

സിനിമയിൽ അവസരങ്ങൾ കുറഞ്ഞതോടെ വിവേക് ശ്രദ്ധ ബിസിനസ് ലോകത്തേക്ക് മാറ്റി. ഒരു സമ്പന്ന കുടുംബത്തിൽ നിന്നുള്ള വിവേക്, 16-ാം വയസ്സിൽ 1 കോടിയും 19-ാം വയസ്സിൽ 12 കോടി രൂപയും സ്റ്റോക്ക് എക്സ്ചേഞ്ചുമായി ബന്ധപ്പെട്ട ബിസിനസ്സിലൂടെ സ്വന്തമായി സമ്പാദിച്ചിരുന്നു. 23-ാം വയസ്സിൽ കമ്പനി വിറ്റ് അദ്ദേഹം വലിയ ലാഭം നേടി.

നിലവിൽ റിയൽ എസ്റ്റേറ്റ്, വിനോദം, ധനകാര്യം എന്നീ മേഖലകളിൽ ബിസിനസ് നടത്തുന്ന വിവേക് ഇന്ത്യൻ ഓഹരി വിപണിയിൽ ഒമ്പത് കമ്പനികളുടെ ഭാഗമാണ്. ദിവസവും 16 മണിക്കൂർ ജോലി ചെയ്യുന്ന അദ്ദേഹം ഇപ്പോൾ കുടുംബത്തോടൊപ്പം ദുബായിലാണ് താമസം. അദ്ദേഹത്തിന്റെ പ്രധാന ബിസിനസായ റിയൽ എസ്റ്റേറ്റ് കമ്പനിക്ക് ദുബായിൽ ഏകദേശം 7 ബില്യൺ ഡോളറാണ് (ഏകദേശം 58,000 കോടി രൂപ) മൂല്യം കണക്കാക്കുന്നത്. ഈ കമ്പനി പൂർണ്ണമായും കടരഹിതമാണ്. വിവേക് ഒബ്‌റോയിയുടെ നിലവിലെ സ്വകാര്യ സമ്പത്ത് ഏകദേശം 1200 കോടി രൂപയോളമാണ്.

"എൻ്റെ പല തലമുറകൾക്ക് ജീവിക്കാനുള്ള സമ്പത്ത് ദൈവം എനിക്ക് തന്നു," എന്ന് അദ്ദേഹം അഭിമുഖത്തിൽ വെളിപ്പെടുത്തി. ദുബായിലെത്തിയ ശേഷമാണ് എൻ.ആർ.ഐ.കൾ രാജ്യത്തിൻ്റെ സമ്പദ്‌വ്യവസ്ഥയിൽ എത്രത്തോളം പ്രധാനമാണെന്ന് അദ്ദേഹം തിരിച്ചറിഞ്ഞത്. കഴിഞ്ഞ 10 വർഷത്തിനിടെ സാമൂഹ്യ സേവനത്തിനായി യു.എസ്., യു.കെ. എന്നിവിടങ്ങളിൽ നിന്ന് ഏകദേശം 40 മില്യൺ ഡോളർ (ഏകദേശം 358 കോടി രൂപ) സമാഹരിച്ച് ഇന്ത്യയിലെ പാവങ്ങൾക്കായി സംഭാവന ചെയ്തതായും വിവേക് ഒബ്‌റോയ് അറിയിച്ചു.