Covid 19| പോത്തീസ്, രാമചന്ദ്രൻ ലൈസന്‍സ് റദ്ദാക്കൽ; നിയമലംഘകർക്ക് തിരുവനന്തപുരം കോർപ്പറേഷന്റെ കടുത്ത മുന്നറിയിപ്പ്

തിരുവനന്തപുരം: കോവിഡ് പ്രോട്ടോക്കോൾ നിരന്തരം ലംഘിച്ചതിനു പിന്നാലെയാണ് നഗരത്തിലെ പ്രധാന ഷോപ്പിംഗ് കേന്ദ്രങ്ങളായ രാമചന്ദ്രൻ, പോത്തീസ് എന്നിവയ്ക്കെതിരെ നടപടിയെടുക്കാൻ തിരുവനന്തപുരം കോർപറേഷനെ പ്രേരിപ്പിച്ചത്.

രണ്ടു സ്ഥാപനങ്ങളുടെയും ലൈസൻസ് നഗരസഭ റദ് ചെയ്തതായി മേയർ കെ.ശ്രീകുമാർ അറിയിച്ചു.

കോവിഡ് പ്രോട്ടോക്കോളും നിയന്ത്രണങ്ങളും പലഘട്ടങ്ങളിലും പാലിക്കാതെ തുറന്ന് പ്രവർത്തിച്ച ഈ രണ്ട് സ്ഥാപനങ്ങൾക്കും നഗരസഭ നേരത്തെ മുന്നറിയിപ്പുകൾ നൽകിയിരുന്നു. എന്നാൽ ഇതൊന്നും പാലിക്കാതെ ഈ സ്ഥാപനങ്ങൾ തുറന്ന് പ്രവർത്തിക്കുകയായിരുന്നു.

തുടർന്നും ഇവ പാലിക്കാതെ തുറന്ന് പ്രവർത്തിക്കുകയും കോവിഡ് വ്യാപനത്തിന് ഈ സ്ഥാപനങ്ങൾ കാരണമാവുകയും ചെയ്തതിനെ തുടർന്നാണ് നഗരസഭയുടെ നടപടി.

നേരത്തെ നടത്തിയ പരിശോധനയിൽ രാമചന്ദ്രൻസിലെ വലിയൊരു വിഭാഗം തൊഴിലാളികൾക്ക് കോവിഡ് സ്ഥിരീകരിച്ചിരുന്നു. ഇതെല്ലാം തന്നെ നഗരത്തിലെ സാഹചര്യം സങ്കീർണ്ണമാക്കുന്നതിൽ പങ്കു വഹിച്ചു എന്നതാണ് നഗരസഭയുടെ വിലയിരുത്തൽ. തുടർന്നാണ് ഇരു സ്ഥാപനങ്ങളുടെയും ലൈസൻസ് ഇനിയൊരു അറിയിപ്പുണ്ടാകുന്നത് വരെ റദ്ദ് ചെയ്യുന്ന കടുത്ത നടപടിയിയിലേക്ക് നഗരസഭയെത്തിയത്.

പോത്തീസിന്റെ ആയൂർവേദ കോളേജ് ജംഗ്ഷനിലെയും രാമചന്ദ്രയുടെ നഗരത്തിലെ നാല് ഷോപ്പുകളുമാണ് അടച്ചു പൂട്ടിയത്. ലോക്ക്ഡൗൺ തുടരുന്നതിനിൽ ഇപ്പോൾ ഷോറൂം അടഞ്ഞ് കിടക്കുകയാണ്. ലോക്ഡൗൺ അവസാനിച്ചാലും ഇവ തുറക്കാൻ അനുവദിക്കില്ല.

ലോക്ക്ഡൗൺ അവസാനിച്ച ശേഷം കോവിഡ് മാനദണ്ഡങ്ങൾ പാലിക്കാൻ സ്വീകരിച്ച നടപടികൾ ഈ സ്ഥാപനങ്ങൾ കോർപ്പറേഷനെ അറിയിക്കണം.

ജീവനക്കാരുടെ താമസ സ്ഥലത്ത് വരുത്തിയ ക്രമീകരണം അടക്കം നഗരസഭയെ ബോധ്യപ്പെടുത്തണം. തുടർന്ന് പരിശോധനയ്ക്ക് ശേഷമെ തുറക്കുന്ന കാര്യം തീരുമാനിക്കുകയുള്ളൂവെന്ന് മേയർ വ്യക്തമാക്കി.

നിരവധി തവണ കോവിഡ് മാർഗനിർദേശം രണ്ട് സ്ഥാപനങ്ങളും ലംഘിച്ചതായാണ് നഗരസഭയുടെ കണ്ടെത്തൽ. രാമചന്ദ്രൻ ടെക്സ്റ്റൈൽസിലെ എൺപതിലധികം ജീവനക്കാർക്കാണ് കോവിഡ് ബാധിച്ചത്.

നഗരത്തിൽ കോവിഡ് വ്യാപനം കൂടാൻ കാരണം ഈ സൂപ്പർ മാർക്കറ്റുകളാണെന്ന പരാതി ഉയർന്നിരുന്നു.

തമിഴ്നാട്ടിൽ നിന്നുള്ളവരെ ക്വാറന്റീനോ കോവിഡ് മാർഗനിർദ്ദേശങ്ങളോ പാലിക്കാതെയാണ് ഇവിടങ്ങളിൽ ജോലിക്കെത്തിച്ചിരുന്നത്. ഈ പരാതികളുടെ സാഹചര്യത്തിലാണ് കോർപറേഷന്റെ നടപടി.