മലപ്പുറം വണ്ടൂരിൽ വൻ കഞ്ചാവ് വേട്ട; മിനിലോറിയിൽ നിന്നും പിടികൂടിയത് 171 കിലോ കഞ്ചാവ്

മലപ്പുറം വണ്ടൂരിൽ വൻ കഞ്ചാവ് വേട്ട. 171 കിലോ കഞ്ചാവുമായി 3 പേരെ എക്സൈസ് പിടികൂടി. സ്റ്റേഷനറി ഉൽപ്പന്നങ്ങളാണന്ന് തെറ്റിദ്ധരിപ്പിച്ച് ആണ് മിനി ലോറിയിൽ കഞ്ചാവ് കടത്താൻ ശ്രമിച്ചത്.

ആന്ധ്രയിൽ നിന്നും കൊച്ചിയിലേക്ക് കൊണ്ടു പോവുകയായിരുന്നു കഞ്ചാവ്. മലപ്പുറം ജില്ലയിൽ വിതരണത്തിനായാണ് വയനാട് അതിർത്തി വഴി ജില്ലയിലേക്കെത്തിയത്.

ആന്ധ്രയിൽ നിന്ന് സിമൻ്റ് നിറച്ച വലിയ ലോറിയിൽ എത്തിയ കഞ്ചാവ് പ്രതികൾ മിനിലോറിയിലെത്തി കണ്ണൂർ അതിർത്തിയിൽ വച്ചാണ് മാറ്റിയത്. തുടർന്ന് മലപ്പുറത്ത് വിതരണം നടത്തി കൊച്ചിയിലെത്തിക്കാനായിരുന്നു പദ്ധതി.

പിടിച്ചെടുത്ത കഞ്ചാവിന് വിപണിയിൽ ഒരു കോടിയോളം വില വരും. ചെർപ്പുളശേരി പാലക്കാപ്പറമ്പിൽ ജാബിർ, ആലുവ കൊച്ചുപറമ്പിൽ മിഥുൻ, പുത്തൻവീട്ടിൽ സുജിത്ത് എന്നിവരാണ് അറസ്റ്റിലായത്.

രഹസ്യവിവരത്തിൻ്റെ അടിസ്ഥാനത്തിൽ കാളികാവ് റേഞ്ച് എക്സൈസും, എക്സൈസ് ആൻറി നാർക്കോട്ടിക് സ്ക്വാഡും, എക്സൈസ് ജില്ലാ ഇൻൻ്റലിജൻസ് വിഭാഗവും സംയുക്തമായാണ് പ്രതികളെ പിടികൂടിയത്.

വാഹനത്തിൽ എഴുപത്തിഏഴോളം പ്രത്യേക പാക്കറ്റുകൾ ആക്കി പ്ലാസ്റ്റിക് ഷീറ്റുകൾ കൊണ്ട് മൂടിയ നിലയിൽ ആയിരുന്നു കഞ്ചാവ്.

ജില്ലയിൽ ഇത്രയും അധികം അളവിൽ മൊത്തവിതരണത്തിന് കൊണ്ടുവന്ന കഞ്ചാവ് പിടികൂടുന്നത് സമീപ കാലത്ത് ഇത് രണ്ടാം തവണ ആണ്. കഴിഞ്ഞ ആഴ്ച മലപ്പുറം പോലീസ് 300 കിലോ കഞ്ചാവ് പിടികൂടിയിരുന്നു