'പ്രതീക്ഷിക്കാത്ത അതിഥി ഉച്ചഭക്ഷണത്തിന് വീട്ടിലെത്തി'; നടൻ ജയറാമിന്‍റെ കുറിപ്പും ചിത്രവും വൈറൽ

ഉച്ചഭക്ഷണത്തിന് ചെന്നൈയിലെ വീട്ടിൽ എത്തിയ അപ്രതീക്ഷിത അതിഥിയെക്കുറിച്ചുള്ള നടൻ ജയറാമിന്‍റെ പോസ്റ്റ് വൈറലാകുന്നു. മലയാളികളുടെ അഭിമാനമായ ക്രിക്കറ്റ് താരം സഞ്ജു സാംസണും ഭാര്യ ചാരുലത രമേഷുമാണ് ജയറാമിന്‍റെ വീട്ടിലെത്തിയത്. ജയറാമിന്‍റെ കുടുംബത്തിനൊപ്പമുള്ള സഞ്ജുവിന്‍റെയും ഭാര്യയുടെയും ചിത്രം ജയറാം തന്നെയാണ് പങ്കുവെച്ചത്.

'പ്രതീക്ഷിക്കാത്ത അതിഥി ഉച്ച ഭക്ഷണത്തിന് വീട്ടിലെത്തി. സഞ്ജു, ചാരു. ഈ നിമിഷം ഞങ്ങളുടെ സ്വകാര്യ അഹങ്കാരം'– ജയറാം ഫേസ്ബുക്കിൽ കുറിച്ചു.

ഇക്കാര്യം സഞ്ജുവും ഇൻസ്റ്റാഗ്രാം പോസ്റ്റിലൂടെ പങ്കുവെച്ചിട്ടുണ്ട്. 'നമ്മുടെ സ്വന്തം ജയറാമേട്ടനും, കുടംബത്തിനുമൊപ്പം കുറച്ച് സമയം ചിലവഴിക്കാൻ സാധിച്ചതിൽ വളരെ അധികം സന്തോഷമുണ്ട്. കാളിദാസിനെ മിസ് ചെയ്‌തു'- സഞ്ജു ഇൻസ്റ്റ​ഗ്രാമിൽ കുറിച്ചു.

ഇപ്പോൾ നടന്നുവരുന്ന ന്യൂസിലാൻഡ് ഏ ടീമിനെതിരായ ഏകദിന പരമ്പരയിൽ ഇന്ത്യ എ ടീമിനെ നയിക്കുന്നത് സഞ്ജു സാംസണാണ്. ഈ മത്സരത്തിനായാണ് സഞ്ജു ചെന്നൈയിലെത്തിയത്. സഞ്ജുവിനൊപ്പം ഭാര്യയുമുണ്ട്. പരമ്പരയിലെ ആദ്യ മത്സരത്തിൽ ഇന്ത്യ വിജയം നേടിയിരുന്നു. ഏഴു വിക്കറ്റിന് ജയിച്ച മത്സരത്തിൽ സഞ്ജു 32 പന്തിൽ 29 റൺസെടുത്ത് പുറത്താകാതെ നിന്നു. മൂന്ന് മത്സരങ്ങളുള്ള ഏകദിന പരമ്പരയിൽ ഇന്ത്യ എ ടീം 1-0ന് മുന്നിലാണ്. രണ്ടാമത്തെ മത്സരം ഇന്ന് ചെപ്പോക്ക് സ്റ്റേഡിയത്തിൽ നടക്കുകയാണ്.

പ്രഖ്യാപനം മുതൽ ശ്രദ്ധനേടിയ ‌മണിരത്നം ചിത്രം പൊന്നിയിൻ സെൽവൻ ആണ് ജയറാമിന്റേതായി പുറത്തുവരാനിരിക്കുന്നത്. വൻതാരനിര അണിനിരക്കുന്ന ചിത്രത്തിൽ ജയറാമിന് പുറമേ മലയാള താരങ്ങളായ ബാബു ആന്റണി, റിയാസ് ഖാൻ ഐശ്വര്യ ലക്ഷ്മി എന്നിവരും അഭിനയിച്ചിട്ടുണ്ട്.