45 കോടി ബഡ്ജറ്റിൽ ഒരുങ്ങിയ സിനിമ നേടിയത് 60,000 രൂപ കളക്ഷൻ; 293 ടിക്കറ്റുകൾ മാത്രം വിറ്റ അർജുൻ കപൂർ ചിത്രം!

ഒരു സിനിമ വിജയിക്കുന്നതിൽ അതിന്റെ തിരക്കഥയുടെ സ്വാധീനം വളരെ വലുതാണ്.വലിയ താരനിരയോ പ്രശസ്ത സംവിധായകരോ ഉണ്ടെങ്കിലും ചിത്രത്തിന്റെ കഥ ജനങ്ങളെ ആകർഷിക്കുന്നില്ലെങ്കിൽ സിനിമ തകർന്നടിയുകയാണ്. അടുത്തിടെ സൂര്യയുടെ 'കങ്കുവ', ശങ്കറിന്റെ 'ഇന്ത്യൻ 2', മണിരത്‌നത്തിന്റെ 'തഗ് ലൈഫ്' പോലുള്ള ചിത്രങ്ങൾ പോലും പ്രേക്ഷകരെ വേണ്ടത്ര സ്വാധീനിക്കുന്നതിൽ പരാജയപ്പെട്ടു. അതേസമയം, താരത്തിളക്കമില്ലാത്ത ചിത്രങ്ങൾ മികച്ച കഥയുടെ ബലത്തിൽ വൻ ഹിറ്റുകളാകുന്നുമുണ്ട്.

ഇത്തരത്തിൽ തീയേറ്ററിൽ വേണ്ടത്ര വിജയം നേടാൻ കഴിയാതെ പോയ ചിത്രമാണ് 2023-ൽ പുറത്തിറങ്ങിയ അർജുൻ കപൂർ, ഭൂമി പെഡ്‌നേക്കർ എന്നിവർ പ്രധാന വേഷത്തിലെത്തിയ 'ദി ലേഡി കില്ലർ'. ബോളിവുഡിലെ സമീപകാലത്തെ ഏറ്റവും വലിയ ദുരന്തമായി ഈ ചിത്രം മാറി. 45 കോടി രൂപ ബഡ്ജറ്റിൽ നിർമ്മിച്ച ഈ ചിത്രത്തിന് തിയേറ്ററുകളിൽ നിന്ന് ലഭിച്ചത് വെറും 60,000 രൂപ മാത്രമാണ്. ഇത് ചിത്രത്തിന്റെ ആകെ മുടക്കുമുതലിന്റെ 0.0001% പോലും തിരികെ ലഭിച്ചില്ല.

'ദി ലേഡി കില്ലർ' എന്ന ചിത്രം അതിരൂക്ഷമായ വിമർശനങ്ങളാണ് നേരിട്ടത്. ചിത്രം മോശമാണെന്ന അഭിപ്രായം എല്ലായിടത്തുനിന്നും ഉയർന്നു. എന്നാൽ ഇതിനേക്കാൾ അത്ഭുതപ്പെടുത്തുന്ന കാര്യം എന്തെന്നാൽ അണിയറപ്രവർത്തകർ ഷൂട്ടിംഗ് പൂർത്തിയാക്കാത്ത ചിത്രം തിയേറ്ററിൽ എത്തിച്ചു എന്നതാണ്.

2022 ഏപ്രിലിലാണ് 'ദി ലേഡി കില്ലറി'ന്റെ ചിത്രീകരണം ആരംഭിച്ചത്. എന്നാൽ, മഴ, റീഷൂട്ടുകൾ, ഷെഡ്യൂളിലെ താമസം എന്നിവ കാരണം ബഡ്ജറ്റ് വർദ്ധിച്ചതല്ലാതെ ചിത്രീകരണം പൂർത്തിയാക്കാൻ കഴിഞ്ഞില്ല. ഏകദേശം 10 ദിവസത്തെ ഷൂട്ടിംഗ് ബാക്കി നിൽക്കെ നിർമ്മാതാക്കൾ വോയിസ് ഓവറുകളും എഡിറ്റിംഗും പൂർത്തിയാക്കി ചിത്രം തിയേറ്റർ റിലീസ് ചെയ്തു .

ചിത്രത്തിന്റെ പ്രൊമോഷനുകളും വളരെ കുറവായിരുന്നു. രാജ്യത്തുടനീളം വെറും 12 തിയേറ്ററുകളിൽ മാത്രമാണ് 'ദി ലേഡി കില്ലർ' പ്രദർശിപ്പിച്ചത്. ഈ തിയേറ്ററുകളിലും ആളൊഴിഞ്ഞ അവസ്ഥയായിരുന്നു. തിയേറ്ററിലെത്തിയ പ്രേക്ഷകരെ ചിത്രത്തിന്റെ പെട്ടെന്ന് അവസാനിക്കുന്ന ക്ലൈമാക്സ് വളരെയധികം നിരാശപ്പെടുത്തി.

ചിത്രം തിടുക്കത്തിൽ പൂർത്തിയാക്കിയതാണെന്നും പകുതി സ്‌ക്രിപ്റ്റുമായി ഷൂട്ടിംഗ് തുടങ്ങിയതാണെന്നും പിന്നീട് സംവിധായകൻ തന്നെ സമ്മതിച്ചു. പകുതി പൂർത്തിയാക്കിയ ചിത്രം കണ്ട് പ്രേക്ഷകർക്ക് കടുത്ത അതൃപ്തിയുണ്ടാവുകയും ചിത്രം സാമ്പത്തികമായി പരാജയപ്പെടുകയും ചെയ്തു.

തുടക്കത്തിൽ നെറ്റ്ഫ്ലിക്സ് ചിത്രത്തിന്റെ OTT അവകാശങ്ങൾ സ്വന്തമാക്കിയിരുന്നെങ്കിലും ഫൈനൽ കട്ട് കണ്ട ശേഷം അവർ കരാറിൽ നിന്ന് പിന്മാറി. മറ്റൊരു OTT പ്ലാറ്റ്‌ഫോമും ചിത്രം എടുക്കാൻ തയ്യാറാകാതെ വന്നതോടെ നിർമ്മാതാക്കൾ ഒടുവിൽ ചിത്രം യൂട്യൂബിൽ റിലീസ് ചെയ്യുകയായിരുന്നു.

45 കോടി രൂപയുടെ ബഡ്ജറ്റിന് വിപരീതമായി വെറും 60,000 രൂപ മാത്രം നേടിയ 'ദി ലേഡി കില്ലർ' സമീപ വർഷങ്ങളിലെ ഏറ്റവും വലിയ പരാജയങ്ങളിൽ ഒന്നായാണ് കണക്കാക്കപ്പെടുന്നത്.