SushantSinghRajput|സുശാന്തിന്റെ ജീവിതത്തെ ആസ്പദമാക്കി സിനിമ; നായകൻ ടിക്ടോക് താരം സച്ചിൻ തിവാരി; ഫസ്റ്റ് ലുക്ക് പോസ്റ്ററും പുറത്ത്

അന്തരിച്ച ബോളിവുഡ് നടൻ സുശാന്ത് സിങ് രാജ്പുത്തിന്റെ ജീവിതത്തിൽ നിന്ന് പ്രചോദനം ഉൾക്കൊണ്ട് സിനിമയൊരുങ്ങുന്നു.

വിജയ് ശേഖർ ഗുപ്ത നിർമ്മിക്കുന്ന ചിത്രത്തിൽ ടിക് ടോക്കിലൂടെ പ്രശസ്തനായ സച്ചിൻ തിവാരിയാണ് ചിത്രത്തിൽ നായകനാകുന്നത്. സുശാന്തുമായുള്ള മുഖ സാദൃശ്യം കൊണ്ട് ശ്രദ്ധേയനാണ് സച്ചിൻ തിവാരി.

ആത്മഹത്യയോ കൊലപാതകമോ? (SUICIDE OR MURDER) എന്നാണ് ചിത്രത്തിന് പേരു നൽകിയിരിക്കുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്ററും പുറത്തിറങ്ങി.

പോസ്റ്റർ പുറത്തിറക്കിക്കൊണ്ട് വിജയ് ശേഖർ ഗുപ്തയാണ് ചിത്രത്തെ കുറിച്ച് അറിയിച്ചിരിക്കുന്നത്.

ഒരു ചെറിയ നഗരത്തില്‍ നിന്നുള്ള പയ്യൻ സിനിമാ മേഖലയിൽ താരമാകുന്നു. ഇതാണ് അദ്ദേഹത്തിന്റെ യാത്ര . സച്ചിൻ തിവാരിയെ പരിചയപ്പെടുത്തുന്നു. #SUICIDE OR MURDERലെ പുറത്തു നിന്നുള്ളയാൾ- വിജയ് ശേഖർ ഗുപ്ത കുറിച്ചു.

സുശാന്ത് ആത്മഹത്യ ചെയ്തത് നമുക്കെല്ലാം ഞെട്ടൽ ആയിരുന്നു. പക്ഷെ ഇത് പുതിയ സംഭവമല്ല. സിനിമ സ്വപ്നങ്ങളെ പിന്തുടര്‍ന്ന് ഇവിടെ എത്തുന്ന പല അഭിനേതാക്കളും സിനിമകളൊന്നും ലഭിക്കാതെ എല്ലാം ഉപേക്ഷിച്ച് പോകുന്നു. പലരും ഈ വഴിയിലൂടെ പോകുന്നു, ചിലർ അവരുടെ ജീവിതകാലം മുഴുവൻ കഷ്ടപ്പെടുന്നു.

അതിനാൽ, ബോളിവുഡിൽ ഗോഡ്ഫാദർ ഇല്ലാത്ത ചെറിയ പട്ടണങ്ങളിൽ നിന്നുള്ള അഭിനേതാക്കൾ എങ്ങനെയൊക്കെ കഷ്ടപ്പെടുന്നു എന്ന കഥ പറയാൻ ഞങ്ങൾ ആഗ്രഹിക്കുന്നു- സിനിമയെ കുറിച്ച് വിജയ് ശേഖർ ഗുപ്ത പറയുന്നു.

അതേസമയം ചിത്രത്തെ കുറിച്ച് അറിയിച്ചതിനു പിന്നാലെ സുശാന്ത് സിംഗിനോട് സാമ്യമുള്ള സച്ചിൻ തിവാരിയുടെ ചിത്രങ്ങളും വീഡിയോകളും ഇന്റർനെറ്റിൽ പ്രചരിക്കുകയാണ്.