അടുത്ത ചിത്രം ഋത്വിക് റോഷനൊപ്പം ബോളിവുഡിൽ; പ്രതിഫലം നൂറ് കോടിയായി ഉയർത്തി ജൂനിയർ എൻടിആർ

RRR ന്റെ തകർപ്പൻ വിജയത്തിനു ശേഷം ഇന്ത്യ മുഴുവൻ ആരാധകരെ സ്വന്തമാക്കിയ താരമാണ് ജൂനിയർ എൻടിആർ. വമ്പൻ പ്രൊജക്ടുകളാണ് ഇപ്പോൾ താരത്തെ തേടിയെത്തുന്നത്. ഇതിൽ ഏറ്റവും ശ്രദ്ധേയം തെന്നിന്ത്യൻ താരത്തിന്റെ ബോളിവുഡ് എൻട്രിയാണ്.

ഋത്വിക് റോഷനൊപ്പം ബോളിവുഡിൽ പ്രധാന വേഷത്തിലെത്താനുള്ള തയ്യാറെടുപ്പിലാണ് ജൂനിയർ എൻടിആർ. അതാകട്ടെ യഷ് രാജ് ഫിലിംസിന്റെ സ്പൈ യൂണിവേഴ്സ് ചിത്രത്തിലും. ഋത്വിക്കിനൊപ്പം വാർ 2 ൽ ജൂനിയർ എൻടിആറും എത്തുമെന്നാണ് റിപ്പോർട്ടുകൾ.

ബോളിവുഡ് ചിത്രത്തിനായി ജൂനിയർ എൻടിആർ വാങ്ങുന്ന പ്രതിഫലമാണ് മറ്റൊരു ശ്രദ്ധേയമായ കാര്യം. ആർആർആറിൽ അഭിനയിക്കാൻ 45 കോടിയായിരുന്നു താരം പ്രതിഫവലമായി വാങ്ങിയത്.

പുതിയ ചിത്രത്തിനായി പ്രതിഫലത്തിൽ നൂറ് ശതമാനം വർധനവാണ് താരം ഇപ്പോൾ വരുത്തിയിരിക്കുന്നത്.

RRR ആഗോള തലത്തിൽ തന്നെ വമ്പ‍ൻ ഹിറ്റായതോടെയാണ് ജൂനിയർ എൻടിആറിന്റേയും രാംചരണിന്റേയും താരമൂല്യവും കുത്തനെ ഉയർന്നത്. വാർ 2 നു വണ്ടി 100 കോടി രൂപയാണ് താരം പ്രതിഫലമായി വാങ്ങുന്നതെന്നാണ് ബോളിവുഡ് ഹങ്കാമ റിപ്പോർട്ടിൽ പറയുന്നത്.

അതേസമയം, വാർ 2 ൽ ഋത്വിക് റോഷന്റെ വില്ലനായി ജൂനിയർ എൻടിആർ എത്തുമെന്നാണ് റിപ്പോർട്ടുകൾ.