Nayanthara | കാത്തിരിപ്പുകൾ അവസാനിക്കുന്നു; 'നയൻതാര: ബിയോണ്ട് ദി ഫെയറി ടെയ്ൽ' ട്രെയിലർ നാളെ എത്തും

തെന്നിന്ത്യയിൽ ഏറെ ആരാധകരുള്ള താരദമ്പതികളാണ് നയൻതാരയും വിഘ്നേഷും. ഇരുവരുടെയും വിവാഹ വീഡിയോ ഡോക്യുമെന്ററിയായി പുറത്തുവിടുമെന്ന് വിവാഹം കഴിഞ്ഞത് മുതൽ അറിയിച്ചതാണ്. വിവാഹം കഴിഞ്ഞ് വർഷങ്ങൾ ഏറെയായിട്ടും വിവാഹ ഡോക്യുമെന്ററിയെ കുറിച്ച് അധികം വിവരങ്ങളൊന്നും പുറത്ത് വിട്ടിരുന്നില്ല.

ഒടുവിൽ കഴിഞ്ഞ ആഴ്ചയാണ് വീഡിയോ നവംബർ 18-ന് നെറ്റഫ്ലിക്സിലൂടെ പുറത്ത് വരുമെന്ന് അറിയിച്ചത്. ഇപ്പോഴിതാ, 'നയൻതാര: ബിയോണ്ട് ദി ഫെയറി ടെയ്ൽ' എന്ന ഡോക്യുമെന്ററിയുടെ ട്രെയിലർ നാളെ പുറത്ത് വിടുമെന്ന് നെറ്റ്ഫ്ലിക്സ് അറിയിച്ചത്.

ട്രെയിലർ റിലീസിനോടനുബുന്ധിച്ച് പോസ്റ്ററും പങ്കുവച്ചിട്ടുണ്ട്. മക്കളായ ഉയിരും ഉലകും നയൻതാരയും വിഘ്നേഷുമാണ് പോസ്റ്ററിലുള്ളത്. നവംബർ 9 ശനിയാഴ്ചയാണ് ട്രെയിലർ എത്തുന്നത്. ഒരു മണിക്കൂർ 21 മിനിറ്റ് ദൈർഘ്യമുള്ള വീഡിയോയിൽ നയൻ‌താരയുടെ വിവാഹ വീഡിയോയും അവരുടെ ജീവിത കഥയുമാണ് പറയുന്നത്.

2022 ജൂൺ ഒൻപതിനായിരുന്നു നയൻതാരയും വിഗ്നേഷ് ശിവനും വിവാഹം കഴിച്ചത്. ഈ ഡോക്യുമെന്ററി സംവിധാനം ചെയ്തത് സംവിധായകൻ ഗൗതം വാസുദേവാണ്. നയൻ‌താരയുടെ കല്യാണ വീഡിയോ എന്ന നിലയിൽ മാത്രമല്ല, അവരുടെ ജീവിതത്തിലെ നിർണായക ഘട്ടങ്ങളെ കൂടി ഉൾപ്പെടുത്തിയാണ് ഡോക്യുമെന്ററി സംവിധാനം ചെയ്തിരിക്കുന്നതെന്ന് ഗൗതം വാസുദേവ് നേരത്തെ പറഞ്ഞിരുന്നു.

ഡോക്യുമെൻ്ററിയുടെ റൈറ്റ്‍സ് ആയി നയൻതാരയ്ക്ക് 25 കോടിയാണ് നെറ്റ്ഫ്ലിക്സ് നല്‍കിയതെന്ന് നേരത്തെ റിപ്പോർട്ടുകളുണ്ടായിരുന്നു.