Bro Daddy | സ്റ്റൈലൻ ലുക്കിൽ പൃഥ്വിയും കല്യാണിയും; 'ബ്രോ ഡാഡി' ലൊക്കേഷനിലെ ചിത്രങ്ങൾ പുറത്ത്

ഹൈദരാബാദിൽ ഷൂട്ടിംഗ് പുരോഗമിക്കുന്ന മോഹൻലാൽ -പൃഥ്വിരാജ്  സിനിമ ബ്രോ-ഡാഡിയുടെ ആദ്യ ചിത്രങ്ങൾ പുറത്തിറങ്ങി. സംവിധായകൻ പൃഥ്വിരാജും കല്യാണി പ്രിയദർശനും കൂടി സ്റ്റൈലിഷ് ലുക്കിൽ നിൽക്കുന്ന ചിത്രമാണ് ഇപ്പോൾ പുറത്തിറങ്ങിയിരിക്കുന്നത്. ഒരു മുഴുനീള കുടുംബ ചിത്രമായാണ് 'ബ്രോ ഡാഡി' ഒരുങ്ങുന്നത്

'ഡയറക്ടർ സർ വീണ്ടും മോണിറ്ററിനു പിന്നിലെത്തി' എന്ന സന്തോഷ വർത്തമാനം പൃഥ്വിരാജിന്റെ ഭാര്യയും, ചലച്ചിത്ര നിർമ്മാതാവും, മാധ്യമപ്രവർത്തകയുമായ സുപ്രിയ മേനോൻ സോഷ്യൽ മീഡിയയിൽ പോസ്റ്റ് ചെയ്താണ് ഷൂട്ടിംഗ് ആരംഭിച്ച വിവരം പുറത്തറിയുന്നത്. കേരളത്തിൽ ചിത്രീകരണാനുമതി ലഭിക്കാത്തതിന് ശേഷമാണ് സിനിമ തെലങ്കാനയിലേക്ക് പോയത

ഷൂട്ടിംഗ് വേളയിൽ ഷോട്ട് നിയന്ത്രിക്കുന്ന പൃഥ്വിരാജ് ആണ് ഈ ചിത്രത്തിലുള്ളത്. മീന, ലാലു അലക്സ്, മുരളി ഗോപി, കനിഹ, സൗബിൻ ഷാഹിർ എന്നിവരും ചിത്രത്തിലുണ്ട്. ആശിർവാദ് സിനിമാസിന്റെ ബാനറിൽ ആന്റണി പെരുംബാവൂരാണ് ചിത്രം നിർമ്മിക്കുന്നത്. ശ്രീജിത്തും ബിബിനും ചേർന്ന് രചിച്ച രസകരമായ ഒരു കുടുംബ കഥയാണ് ഈ ചിത്രം പറയുന്നത്

ലൂസിഫറിന് ശേഷം പൃഥ്വിരാജ് സംവിധാനം ചെയ്യുകയും മോഹൻലാൽ നായകനാവുകയും ചെയ്യുന്ന ചിത്രമാണ് 'ബ്രോഡാഡി'. മോഹൻലാൽ സംവിധാനം ചെയ്യുന്ന 'ബറോസ്' എന്ന സിനിമയിൽ പൃഥ്വിരാജ് വേഷമിടുന്നുണ്ട്