സുരേഷ് ​ഗോപി 'ഒറ്റക്കൊമ്പൻ' ഉപേക്ഷിച്ചെന്ന് സോഷ്യൽമീഡിയ; ഊഹാപോഹങ്ങൾ കാറ്റിൽ പറത്തി അപ്ഡേറ്റുമായി താരം

സുരേഷ് ​ഗോപി കേന്ദ്രമന്ത്രി ആയതുമുതൽ ചർച്ചയായ വിഷയമായിരുന്നു ഇനി അഭിനയിക്കുമോ ഇല്ലയോ എന്നുള്ളത്. കേന്ദ്രത്തിൽ നിന്നും അനുമതി വാങ്ങിയതിന് ശേഷം സുരേഷ് ​ഗോപി അഭിനയിക്കുെമന്നുള്ള തരത്തിൽ വാർത്തകൾ പ്രചരിക്കുന്നതിനിടെയാണ്, കഴിഞ്ഞ ദിവസം താരത്തിന്റെ പുതിയ ഫോട്ടോ ഇൻസ്റ്റ​ഗ്രാമിൽ ട്രെൻഡിം​ഗായത്.

താടി വടിച്ച ​ഗെറ്റപ്പിലുള്ള ചിത്രമായിരുന്നു സുരേഷ് ​ഗോപി പങ്കുവച്ചത്. ഇതോടെ താരം ഒറ്റകൊമ്പൻ ഉപേക്ഷിച്ചെന്ന നിലയിലെ ചർച്ചകളൈായിരുന്നു സോഷ്യൽ മീഡിയയിൽ. അഭിനയിക്കാനുള്ള അനുവാദം കേന്ദ്രത്തിൽ നിന്നും ലഭിക്കാത്തതിനെ തുടർന്ന് ഈ പ്രോജക്ട് താൽക്കാലികമായി നീട്ടിവച്ചെന്നായിരുന്നു ചർച്ചകൾ.

ഇപ്പോഴിതാ, ഊഹാപോഹങ്ങൾ കാറ്റിൽ പറത്തി ഒറ്റകൊമ്പനെ പുതിയ അപ്ഡേഷൻ പങ്കുവച്ചിരിക്കുകയാണ് സുരേഷ് ​ഗോപി. 'ഊഹാപോഹങ്ങൾക്ക് ഇടമില്ല'എന്ന കുറിപ്പിനോടൊപ്പം സുരേഷ് ​ഗോപിയുടെ മുഖം കുറച്ച് മാത്രം വ്യക്തമാകുന്ന പോസ്റ്റിൽ അ​ദ്ദേഹം താടി വച്ചാണ് പ്രത്യക്ഷപ്പെട്ടിരിക്കുന്നത്. ചിത്രം അടുത്ത വർഷം തിയേറ്ററിലെത്തുമെന്ന് സൂചിപ്പിക്കുന്ന തരത്തിൽ 2025 എന്നും പോസ്റ്ററിൽ ചേർത്തിരിക്കുകയാണ്.

സുരേഷ് ഗോപിയുടെ 250-മത്തെ ചിത്രമാണ് ഒറ്റക്കൊമ്പന്‍. മാത്യൂസ് തോമസ് സംവിധാനം ചെയ്യുന്ന ചിത്രം ​ഗോകുലം ​ഗോപാലനാണ് നിർമിക്കുന്നത്. ഷിബിന്‍ ഫ്രാന്‍സിസ് രചന നിര്‍വ്വഹിച്ചിരിക്കുന്ന ചിത്രത്തിന്റെ ഛായാഗ്രഹണം ഷാജി കുമാറാണ്.

കേന്ദ്രമന്ത്രിയായ ശേഷം സുരേഷ് ഗോപി ആദ്യമായി അഭിനയിക്കുന്ന ചിത്രം ‘ഒറ്റക്കൊമ്പന്റെ’ ചിത്രീകരണം സെപ്റ്റംബറിൽ ആരംഭിക്കുമെന്നു താരം തന്നെ മുന്പ് പറഞ്ഞിരുന്നു. എന്നാൽ കേന്ദ്രത്തിൽ നിന്നും അഭിനയിക്കാൻ അനുവാദം ലഭിക്കാത്തിനെ തുടർന്ന് സിനിമ ഇതുവരെയും തുടങ്ങാൻ സാധിച്ചില്ല