'വിഭജന സമയത്ത് ഇന്ത്യയ്ക്കൊപ്പം നിന്ന മുസ്ലീങ്ങൾ വലിയ ഔദാര്യമൊന്നുമല്ല ചെയ്തത്': വീണ്ടും പ്രകോപനം ഉയർത്തി യോഗി ആദിത്യ നാഥ്

ന്യൂഡൽഹി: വീണ്ടും പ്രകോപനപരമായ പ്രസ്താവനയുമായി യുപി മുഖ്യമന്ത്രി യോഗി ആദിത്യനാഥ്.

വിഭജന സമയത്ത് ഇന്ത്യയിൽ തന്നെ തുടരാന്‍ തീരുമാനിച്ച മുസ്ലീങ്ങൾ രാജ്യത്തിന് വലിയ ഔദാര്യമൊന്നുമല്ല ചെയ്തത് എന്നായിരുന്നു യോഗിയുടെ പ്രസ്താവന.

ബിബിസി ഹിന്ദിക്ക് അനുവദിച്ച ഒരു അഭിമുഖത്തിലാണ് യോഗി ഇത്തരമൊരു പരാമർശം നടത്തിയത്.

'പാകിസ്താന്റെ രൂപീകരണത്തിലേക്ക് നയിച്ച വിഭജനത്തെ അവർ എതിർക്കേണ്ടതായിരുന്നുവെന്നും അഭിമുഖത്തിൽ യോഗി ആദിത്യനാഥ് വ്യക്തമാക്കി.

പൗരത്വ നിയമ ഭേദഗതിക്കെതിരെ രാജ്യത്തിന്റെ വിവിധയിടങ്ങളിൽ ഇപ്പോഴും പ്രതിഷേധം തുടരുന്ന സാഹചര്യത്തിലാണ് യുപി മുഖ്യമന്ത്രിയുടെ പ്രകോപനപരമായ പ്രതികരണം.

രണ്ട് ദിവസത്തിനുള്ളിൽ ഡൽഹി തെരഞ്ഞെടുപ്പ് നടക്കാനിരിക്കെ ആദിത്യനാഥിന്‍റെ ഇത്തരമൊരു പരാമർശം വൻവിവാദങ്ങൾക്ക് വഴി തുറന്നിട്ടുണ്ട്.

സാമുദായികമായി ഭിന്നത വളർത്തുന്ന പ്രസ്താവനകൾ നടത്തുന്ന യോഗി ആദിത്യനാഥിനെ പ്രചാരണ പരിപാടികളിൽ നിന്ന് വിലക്കണമെന്നാണ് ആം ആദ്മി പാർട്ടി തെരഞ്ഞെടുപ്പ് കമ്മീഷനോട് ആവശ്യപ്പെട്ടിരിക്കുന്നത്.

നേരത്തെ ഒരു പ്രചാരണ റാലിക്കിടെ ഡൽഹി മുഖ്യമന്ത്രി അരവിന്ദ് കെജ്രിവാളിനെ ആദിത്യനാഥ് തീവ്രവാദി എന്ന് വിശേഷിപ്പിച്ചത് വലിയ പ്രതിഷേധങ്ങൾക്ക് വഴിവച്ചിരുന്നു.

പൗരത്വ നിയമ ഭേദഗതിക്കെതിരെ ഷഹീൻ ബാഗിൽ നടക്കുന്ന പ്രതിഷേധങ്ങൾ ആപ്പാണ് സ്പോണ്‍സർ ചെയ്യുന്നതെന്ന ആരോപണവും ഉന്നയിച്ചിരുന്നു,