പ്രാചീന ചുമർ ചിത്രങ്ങളാൽ സമ്പന്നമായ കോഴിക്കോട് മണിയൂർ മഠം ശ്രീകൃഷ്ണ ക്ഷേത്രം

നൂറ്റാണ്ടുകളുടെ ചരിത്രം പറയുന്ന ചിത്രങ്ങൾക്കൊപ്പം ചേർക്കാൻ പുതു ചിത്രങ്ങൾ കൂടി ചേർത്ത് കലയാൽ സമ്പുഷ്ടമാവുകയാണ് കോഴിക്കോട് മണിയൂർ മഠം ശ്രീകൃഷ്ണ ക്ഷേത്രം. നിരവധി പേരെ ആകർഷിക്കുന്ന ചിത്രങ്ങളിൽ ശ്രീകൃഷ്ണനും കൃഷ്ണൻ്റെ അവതാരങ്ങളുമാണ് പ്രമേയം.

പ്രകൃതിദത്ത ചേരുവകൾ ചേർത്ത് വരച്ചെടുത്ത ചുവർ ചിത്രങ്ങളാണ് മണിയൂർ ശ്രീകൃഷ്ണ മഠം ക്ഷേത്രത്തിൻ്റെ പ്രത്യേകത. നൂറ്റാണ്ടുകൾ പഴക്കമുള്ള ചിത്രങ്ങൾ ഇന്നും തെളിമയോടെ ക്ഷേത്ര ചുവരുകളിൽ കാണാം.

സാധാരണ ക്ഷേത്രങ്ങളിലെ ചുവർ ചിത്രങ്ങളിൽ നിന്ന് വ്യത്യസ്തവും ഏറെ പ്രത്യേകതകളുമുള്ളതാണ് ഇവിടുത്തെ ചിത്രങ്ങളെന്ന് ഈ മേഖലയിലെ പ്രമുഖർ പറയാറുണ്ട്. ശ്രീകൃഷ്ണനും കൃഷ്ണൻ്റ അവതാരങ്ങളുമാണ് ചിത്രങ്ങളിലെ പ്രതിപാദ്യം. ക്ഷേത്ര ശ്രീകോവിലിനു ചുറ്റും തലയുയർത്തി നിൽക്കുന്ന ചിത്രങ്ങൾക്ക് മൂന്നു നൂറ്റാണ്ടിലേറെ പഴക്കമുണ്ട്. ചിത്രങ്ങൾ കാണാനും പഠനവിധേയമാക്കാനും നിരവധി പേരാണ് ഇവിടെയെത്താറുള്ളത്.

ക്ഷേത്രത്തെ ഒരു ചിത്ര സങ്കേതമാക്കി മാറ്റാനാണ് നാട്ടുകാരുടെയും ശ്രമം. മണ്ണും കല്ലും പച്ചിലകളും ചേർത്ത് പ്രകൃതി ദത്ത ചായക്കൂട്ടൊരുക്കി വരച്ചെടുത്ത ജീവൻ തുടിക്കുന്ന ചിത്രങ്ങൾ പോയകാല ചിത്രകലയുടെ പ്രശസ്തി വിളിച്ചോതുന്നുണ്ട്. ചിര പ്രാചീനമായ ചുമർ ചിത്രങ്ങൾ സംരക്ഷിച്ചു നിർത്തുന്നതിന് പുരാവസ്തു വകുപ്പും മുന്നോട്ട് വന്നത് നാടിന് പ്രതീക്ഷ നൽകുന്നുണ്ട്.

നാലമ്പലത്തിനു ചുറ്റും നാട്ടുകാരുടെ നേതൃത്വത്തിൽ രണ്ടര ലക്ഷം രൂപ ചെലവഴിച്ച് കൃഷ്ണലീലകൾ ആലേഖനം ചെയ്ത ഏതാനും ചിത്രങ്ങൾ കൂടി വരച്ചു ചേർത്തിട്ടുണ്ട്. ചിത്രകാരൻ മേപ്പയ്യൂർ സ്വദേശി നവീൻ കുമാറിൻ്റ നേതൃത്വത്തിലാണ് ചിത്രങ്ങൾ വരച്ചു ചേർത്തത്.

ടിടികെ (തളിപ്പറമ്പ് തൃച്ഛമ്പലം കാഞ്ഞിരങ്ങാട്) ദേവസ്വത്തിന് കീഴിലാണ് മണിയൂർ മഠം ശ്രീകൃഷ്ണ ക്ഷേത്രം. എല്ലാ വർഷവും വിഷു വിളക്കായാണ് ഉത്സവം നടത്താറുള്ളത്. ആറു ദിവസങ്ങളിലായി നടക്കുന്ന ഉത്സവത്തിലെ തിടമ്പു നൃത്തവും ഏവരെയും ആകർഷിക്കുന്നതാണ്. കടത്തനാടൻ ക്ഷേത്ര ചടങ്ങുകളിലെ അപൂർവ കാഴ്ചകളിലൊന്നാണിത്.

അഞ്ച് വർഷത്തിനിടയിൽ ജനകീയ കൂട്ടായ്മയിൽ കുളം നവീകരണം, ശൗചാലയ നിർമാണം ഉൾപ്പെടെ നിരവധി വികസന പ്രവർത്തനങ്ങളും ക്ഷേത്രത്തിൽ നടത്തിയിട്ടുണ്ട്.