Rahul in Wayanad | കാവ്യയ്ക്കും കാർത്തികയ്ക്കും ജീവിതത്തിലേക്കുള്ള താക്കോൽ; രാഹുൽ ഗാന്ധിയുടെ മണ്ഡല പര്യടനത്തിന് തുടക്കം

മലപ്പുറം: കവളപ്പാറ ദുരന്തത്തിൽ വീടിനൊപ്പം പ്രിയപ്പെട്ടവരെ കൂടി നഷ്ടമായ കാവ്യക്കും കാർത്തികക്കും മലപ്പുറം കളക്ട്രേറ്റിൽ വച്ച് രാഹുൽ ഗാന്ധി കൈമാറിയ താക്കോൽ വീടിന്റെ മാത്രമല്ല, ജീവിതത്തിന്റെ കൂടിയാണ്. എല്ലാം നഷ്ടമായ ഈ സഹോദരിമാർക്ക് ഇത് നൽകുന്ന ആശ്വാസം വാക്കുകൾക്ക് അപ്പുറത്താണ്. കാവ്യയും കാർത്തികയും വീണ്ടും ചിരിക്കാൻ തുടങ്ങുക ആണ്.

കവളപ്പാറ ദുരന്തം പ്രിയപ്പെട്ടവരെയും പ്രിയപ്പെട്ടതിനെയും എല്ലാം തുടച്ച് നീക്കിയപ്പോൾ നിരാശയുടെ ആഴങ്ങളിൽ ആയി ഈ സഹോദരിമാർ. പ്രളയകാലത്തെ സന്ദർശനസമയത്ത് രാഹുൽ ഇവരെ കാണുകയും ആശ്വസിപ്പിക്കുകയും ചെയ്തു. ഇവർക്ക് വേണ്ടത് ചെയ്ത് നൽകാൻ നിർദ്ദേശവും നൽകി. അങ്ങനെ ആണ് കോൺഗ്രസ് ഇവർക്ക് പുതിയ വീട് നിർമിച്ച് നൽകിയത്.

കളക്ട്രേറ്റിൽ നടന്ന ചടങ്ങിൽ രാഹുൽ വീടിന്റെ താക്കോൽ നൽകിയതോടെ കാവ്യക്കും കാർത്തികക്കും സുരക്ഷയുടെ മേൽക്കൂര മാത്രമല്ല ലഭിച്ചത്. മുത്തപ്പൻ കുന്നിലെ മണ്ണ് മൂടിക്കളഞ്ഞ ജീവിതം കൂടി ആണ്. കളക്ട്രേറ്റിന് മുൻപിൽ തന്നെ കാണാൻ കാത്ത് നിന്ന ആരെയും രാഹുൽ നിരശാരാക്കിയില്ല.

ഡിഫറന്റലി ഏബിൾഡ് പീപ്പിൾസ് ലീഗ് എന്ന ഭിന്ന ശേഷിക്കാരുടെ സംഘടന പ്രതിനിധി ബഷീറിന്റെ അരികിലേക്കും രാഹുൽ വന്നു, സംസാരിച്ചു. ബഷീർ പറഞ്ഞത് കേട്ടു. സംഘടനയ്ക്ക് പിന്തുണയും വാഗ്ദാനം ചെയ്തു. മലപ്പുറം കളക്ട്രേറ്റിൽ ചേർന്ന കോവിഡ് അവലോകന യോഗത്തിലും രാഹുൽ പങ്കെടുത്തു. കോവിഡിനെ അതിജീവിക്കാൻ സ്വീകരിച്ച നടപടികൾ രാഹുൽ കേട്ട് മനസ്സിലാക്കി, വിലയിരുത്തി, അഭിപ്രായങ്ങളും നിർദേശങ്ങളും അറിയിച്ചു.

കോവിഡ് നിയന്ത്രണങ്ങൾ ഉണ്ടെങ്കിലും രാഹുലിനെ കാണാനും നിവേദനങ്ങൾ നൽകാനും ഫോട്ടോ എടുക്കാനും ഒക്കെ ആയി നിരവധി പേർ മലപ്പുറത്ത് എത്തിയിരുന്നു. കോവിഡ് പ്രോട്ടോകോൾ പാലിച്ച് കൊണ്ടാണ് രാഹുൽ പരിപാടികളിൽ പങ്കെടുക്കുന്നത്.

അത് കൊണ്ട് തന്നെ ഇത്തവണ പൊതുപരിപാടികൾ ഇവിടെയും സംഘടിപ്പിച്ചിട്ടില്ല. മലപ്പുറം ഗസ്റ്റ് ഹൗസിൽ നിന്ന് ഉച്ച ഭക്ഷണം കഴിച്ച ശേഷം രാഹുൽ കല്പറ്റക്ക് തിരിച്ചു. കല്പറ്റ ഗസ്റ്റ് ഹൗസിൽ ആണ് രാഹുൽ ഇനി ഉള്ള രണ്ട് ദിവസം ഉണ്ടാവുക. ബുധനാഴ്ചയാണ് രാഹുൽ ദില്ലിക്ക് മടങ്ങുക.