വലുപ്പത്തിൽ കുഞ്ഞൻ: ക്യാൻസറിനെ പ്രതിരോധിക്കും; തലച്ചോറിനെ ഉദ്ദീപിപ്പിക്കും

കണ്ടാൽ ഒട്ടും വലുപ്പമില്ല. സ്വദേശം നാടല്ല കാടാണ്. മണത്തു നോക്കിയാൽ നല്ല കയ്പ്പൻ പാവലിന്‍റെ ഗന്ധമാണ് എന്നാലോ, ഒട്ടും കയ്പ്പില്ല. സംസ്ഥാന കർഷക അവാർഡ് ദാന ചടങ്ങിനോട് അനുബന്ധിച്ച് ആലപ്പുഴയിൽ ഒരുക്കിയ കാർഷിക പ്രദർശനത്തിൽ എല്ലവരുടെയും കണ്ണ് ഈ കുഞ്ഞൻ പാവക്കയിൽ ആയിരുന്നു.

കാടുകളിൽ കാണപ്പെടുന്ന കയ്പ്പില്ലാത്ത പാവയ്ക്ക നാട്ടിലെ കൃഷിയിടത്തിലേക്ക് കൊണ്ടുവന്നത് ആലപ്പുഴ കളർകോട് സ്വദേശി സുരേഷ് കുമാർ ആണ്. ആദിവാസി ഗോത്ര വർഗക്കാർ ഉപയോഗിക്കുന്ന ഗന്‍റോലിനെക്കുറിച്ച് നിരവധി ഗവേഷണങ്ങൾ നടന്നിട്ടുണ്ട്. കാൻസർ പ്രതിരോധിക്കാൻ കഴിവുണ്ടെന്നതാണ് പ്രധാന കണ്ടെത്തൽ. തലച്ചോറിനെ ഉദ്ദീപിപ്പിക്കുന്നതിനാൽ ബ്രയിൻ ബൂസ്റ്റർ എന്നും അറിയപ്പെടുന്നു. ഹോർമോൺ സന്തുലിതമാക്കാനുള്ള ശേഷിയും പ്രകൃതിദത്ത വേദനസംഹാരിയുമാണ് ഈ കാട്ടു പാവൽ.

ശരീരത്തിന്‍റെ പ്രവർത്തനങ്ങളെ സന്തുലിതമാക്കുന്ന നിരവധി ഘടകങ്ങൾ പ്രകൃതി ഗന്‍റോലയിൽ കോർത്തിണക്കിയിട്ടുണ്ട്. അസംസ്‌കൃത മാംസ്യം, നാരുകൾ, കൊഴുപ്പ്, എന്നിവയ്ക്കൊപ്പം ജീവകം എ, ബി - 1, ബി - 2, ബി - 6, എച്ച്, കെ എന്നിവയുടെ കലവറ കൂടിയാണ്. ഇൻസുലിൻ ഗ്രന്ധികളെ ഉത്തേജിപ്പിച്ച് ഇൻസുലിൻ ഉത്പാദനം വർദ്ധിപ്പിക്കാനുള്ള ഗന്‍റോലയുടെ ശേഷി രക്തത്തിലെ ഷുഗറിന്‍റെ അളവ് ക്രമീകരിക്കുന്നു. പ്രമേഹരോഗികൾക്ക് ഗന്‍റോല രക്ഷകൻ തന്നെയാണ്.

കാട്ടിൽ നിന്ന് വിത്ത് ശേഖരിച്ചാണ് ഗന്‍റോല പലയിടത്തും കൃഷി ചെയ്യുന്നത്. പുരയിട കൃഷിയിലും ഗ്രോബാഗിലും വളർത്താം. മഴക്കാല കൃഷിക്ക് അനുയോജ്യമായ വിളയാണിത്.