ചാറ്റിംഗ് ഒഴിവാക്കാൻ വീട്ടുകാർ വാട്സാപ് അൺഇൻസ്റ്റാൾ ചെയ്തു: ഇടുക്കിയിൽ പെൺകുട്ടി ജീവനൊടുക്കി

നെടുങ്കണ്ടം: ഓൺലൈൻ പഠനത്തിനായി വാങ്ങിയ മൊബൈൽ ഫോണിൽ കൂടുതൽ സമയം ചെലവഴിക്കുന്നതിന് അമ്മ ശകാരിച്ചതിനു പിന്നാലെ പെൺകുട്ടിയെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തി. നെടുങ്കണ്ടം പൊലീസ് സ്റ്റേഷൻ പരിധിയിലാണു സംഭവം.

പൊലീസ് പറയുന്നതിങ്ങനെ– കഴിഞ്ഞ ദിവസം പെൺകുട്ടി വാട്സാപ്പിൽ ചാറ്റ് ചെയ്യുന്നത് ശ്രദ്ധയിൽപെട്ടതോടെ അമ്മ ഫോൺ വാങ്ങി വയ്ക്കുകയും ശകാരിക്കുകയും ചെയ്തിരുന്നു. ഇതിനിടെ ഫോൺ അലമാരിയിൽ നിന്നു താഴെ വീണു തകരാറിലായി.

പെൺകുട്ടിയുടെ സഹോദരൻ ഫോൺ നന്നാക്കി നൽകിയെങ്കിലും വാട്സാപ് ആപ്ലിക്കേഷൻ ഫോണിൽ നിന്നു നീക്കം ചെയ്തിരുന്നു. ഇതോടെ രണ്ട് ദിവസമായി പെൺകുട്ടി വീട്ടിൽ ആരോടും സംസാരിക്കാതെയായി.

തിങ്കളാഴ്ച വൈകിട്ട് അമ്മ പുറത്തേക്കു പോയ സമയത്താണു ജീവനൊടുക്കിയത്. നെടുങ്കണ്ടം പൊലീസ് അസ്വാഭാവിക മരണത്തിനു കേസെടുത്ത് അന്വേഷണം ആരംഭിച്ചു.

(ആത്മഹത്യ ഒന്നിനും പരിഹാരമല്ല.. അതിജീവിക്കാൻ ശ്രമിക്കുക. മാനസികാരോഗ്യ വിദഗ്ധരുടെ സഹായം തേടുക.. Toll free helpline number: 1056, മറ്റ് ഹെൽപ് ലൈൻ നമ്പറുകൾ: പ്രതീക്ഷ (കൊച്ചി ) -048-42448830, മൈത്രി ( കൊച്ചി )- 0484-2540530, ആശ്ര (മുംബൈ)-022-27546669, സ്നേഹ (ചെന്നൈ ) -044-24640050, സുമൈത്രി -(ഡല്‍ഹി )- 011-23389090, കൂജ് (ഗോവ )- 0832- 2252525, റോഷ്നി (ഹൈദരാബാദ്) -040-66202000)