വിവാഹത്തിന് സുഹൃത്തുക്കളുടെ തമാശ; വധുവും വരനും ആശുപത്രിയിൽ

കൊയിലാണ്ടി: വിവാഹത്തിന് സുഹൃത്തുക്കൾ ഒപ്പിച്ച തമാശ അതിരുവിട്ടതോടെ വധുവും വരനും ആശുപത്രിയിലായി. കൊയിലാണ്ടിയിലെ ഒരു ഉൾപ്രദേശത്തു നടന്ന വിവാഹ സൽക്കാരത്തിനിടെയാണ് സംഭവം.

വിവാഹത്തിനിടെ സുഹൃത്തുക്കൾ ഒരുക്കിയ തമാശയുടെ ഭാഗമായി വധുവിനെയും വരനെയും കൊണ്ട് കാന്താരി മുളക് കലക്കിയ വെള്ളം കുടിപ്പിച്ചു. എന്നാൽ ഇത് വിനയാവുകയായിരുന്നു.

വെള്ളം കുടിച്ചതിനെ തുടർന്ന് ഇരുവർക്കും ശാരീരിക അസ്വസ്ഥത അനുഭവപ്പെട്ടു. ഇരുവരെയും ഉടൻ തന്നെ കൊയിലാണ്ടി താലൂക്ക് ആശുപത്രിയിൽ എത്തിച്ച് ചികിത്സ നൽകി.

വിവാഹശേഷം ഭക്ഷണംകഴിക്കുന്നതിന് മുന്നോടിയായിട്ടാണ് ഇരുവരെയും വരന്റെ സുഹൃത്തുകള്‍ നിര്‍ബന്ധിപ്പിച്ച്‌ കാന്താരി കുത്തിപ്പിഴിഞ്ഞ വെള്ളം കുടിപ്പിച്ചത്‌.

കൊയിലാണ്ടി പൊലീസ് ആശുപത്രിയിലെത്തി ഇരുവരുടെയും മൊഴിയെടുത്തെങ്കിലും വധുവിനും വരനും പരാതിയില്ലെന്ന് എഴുതി നൽകിയതിനാൽ കേസെടുത്തില്ല.

വിവാഹത്തിന് വധൂവരന്മാരെ തമാശയ്ക്ക് റാഗ് ചെയ്യുന്നത് ഇപ്പോൾ ഒരു ട്രെന്റാണ്. പല സ്ഥലങ്ങളിലും തമാശ അതിരുവിട്ട് അടിപിടിയിൽ വരെ എത്താറുണ്ട്.