Good News| തെരുവിൽ വിശക്കുന്നവർക്ക് ആഹാരവുമായി കൊച്ചിയിലെ രണ്ട് പോലീസ് ഉദ്യോഗസ്ഥർ

തെരുവിൽ വിശക്കുന്നവർക്ക് ആഹാരവുമായി കൊച്ചിയിലെ രണ്ട് പോലീസ് ഉദ്യോഗസ്ഥർ

പോലീസിനെക്കുറിച്ചുള്ള ധാരണകൾ തിരുത്തുകയാണ് കാക്കിക്കുള്ളിലെ  കനിവുള്ള ചില മനസ്സുകൾ.

ലോക് ഡൗൺ നിലവിൽ വന്നതോടെ തെരുവിൽ അനാഥരായത് നിരവധി പേരാണ്.

ജോലിക്കിടയിൽ കണ്ടെത്തിയ ഇവർക്ക്  ആഹാരവുമായി കൊച്ചിയിലെ രണ്ട് പോലീസ് ഉദ്യോഗസ്ഥർ എത്തി.

ഒരാൾ അസിസ്റ്റൻറ് പോലീസ് കമ്മീഷണർ ലാൽജി. മറ്റൊരാൾ കളമശേരി സി.പി.ഒ. പി. എസ്.രഘു. 

പരമാവധി പൊതിച്ചോറുകളും സംഭരിച്ച് വിശക്കുന്നവരെ തേടി ഇവരെത്തി. കൊറോണ സംബന്ധിച്ച ജോലിത്തിരക്കിനിടയിലാണ് അസിസ്റ്റൻറ് കമ്മീഷണർ ലാൽജി ഇതിനായി സമയം കണ്ടെത്തിയത്.

ഇദ്ദേഹം നൽകിയ ആഹാരം മുപ്പതോളം പേരുടെ വിശപ്പടക്കി. വൈകിട്ടത്തേക്കുള്ള ആഹാരവും എത്തിച്ചു നൽകിയ ശേഷമാണ് ഡ്യൂട്ടി അവസാനിപ്പിച്ച് മടങ്ങിയത്. 

കളമശേരി ഭാഗത്ത് തെരുവിൽ കഴിയുന്നവർക്ക് സഹായവുമായാണ് സിവിൽ പോലീസ് ഉദ്യോഗസ്ഥനായ പി.എസ്.രഘു എത്തിയത്.